پیشگی رقم پہ رعایت کیساتھ خریداری؟

پیشگی رقم پہ رعایت کے ساتھ خریداری؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

السلام علیکم ورحمت اللہ وبرکاتہ
کیا فرماتے ہیں مفتیان کرام مسئلہ ذیل کے بارے میں ایک دوکان دار  پانچ ہزار روپے ایڈوانس اس شرط کے ساتھ لیتا ہے کہ ہر ماہ چار سو روپے کی خریداری کرسکتے ہیں. اس طرح سے پندرہ مہینے میں چھ ہزار روپے کی خریداری ہوجائے گی
   رقم جمع کی گئی پانچ ہزار روپے اور خریداری کی اجازت چھ ہزار روپے تک ہے.
کیا شرعا ایسا کرنا درست ہے؟
جواب دیکر عنداللہ ماجور ہوں
ظفر اقبال قاسمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

الجواب وباللہ التوفیق: 

پانچ ہزار روپے ایڈوانس دیتے وقت اگر قرض کی نیت کی تھی تو اب چھ ہزار کی مراعات لینا قرض پہ منافع لینا ہوا جس کی شرعا گنجائش نہیں ہے۔
کل قرض جر نفعا فھو ربوا ۔
لیکن اگر پانچ ہزار دیتے وقت پیشگی خریداری کی نیت سے ادائی ہوئی تھی تو اس پہ چھ ہزار کی خریداری کرنا درست ہے۔ کیونکہ انعقاد بیع کے بعد متعاقدین میں سے ہر ایک کو ثمن یا مبیع میں اضافہ کی شرعا اجازت ہوتی ہے۔
ہدایہ میں ہے:
ويجوز للبائع أن يزيد للمشتري في المبيع ويجوز أن يحط عن الثمن ويتعلق الاستحقاق بجميع ذالك.ہدایہ 171 /3۔ رشیدیہ
صورت مسئولہ میں چھ ہزار کی خریداری کو بائع کی جانب سے مشتری کے لئے مبیع میں اضافہ پہ محمول کریں تو اس قسم کے عقد کی شرعا  گنجائش ہے۔ تاجروں میں یہ عرف رائج بھی ہے۔اس لئے احقر اسے ملحوظہ قیود کے ساتھ جائز سمجھتا ہے۔

واللہ اعلم بالصواب
شکیل منصور القاسمی