اردو شاعری میں پان

مشہور شعراء کے کلام میں پان کا ذکر 

1 ۔ میرتقی میر

ایک دن پان وے چباتے تھے
سرخ لب ان کے مجھ کو بھاتے تھے

جب ہم کلام ہم سے ہوتا ہے پان کھا کر
کس رنگ سے کرے ہے باتیں چبا چبا کر

غنچہ ہی وہ دہان ہے گویا
ہونٹ پر رنگ پان ہے گویا

بات کرتے جائے ہے منھ تک مخاطب کے جھلک
اس کا لعل لب نہیں محتاج رنگ پان کا

تبسم سحر ہے جب پان سے لب سرخ ہوں اس کے
دلوں میں کام کر جاتا ہے یاں جادو کے تیروں کا

کیا کہیے ایک عمر میں وے لب ہلے تھے کچھ
سو بات پان کھاتے ہوئے وہ چبا گیا

سبزے کا ہوا روکش خط رخ جاناں کے
جو ہاتھ مرے چڑھتا تو پان کو کھا جاتا

خط منھ پہ آئے جاناں خوبی پہ جان دے گا
ناچار عاشقوں کو رخصت کے پان دے گا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

2 ۔ مومن خاں مومن

مجلس میں اس نے پان دیا اپنے ہاتھ سے
اغیار سبز بخت تھے ہم زہر کھا گئے

پان میں یہ رنگ کہاں آپ نے
آپ مرے خون کا دعوی کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
3 ۔ نظیر اکبر آبادی

پان کھایا ہے تو اس وقت بھی لازم ہے یہی
ایک بوسہ ہمیں دیجے لب و دندان کی خیر

آنکھ اٹھا دیکھیے اور دیکھ کے ہنس بھی دیجے
اپنے کاجل کی زکوٰۃ اور مسی و پان کی خیر

پان اس کے لبوں پہ اس قدر ہے زیبا
ہو رنگ پہ جس کے سرخیٔ لعل فدا

محبوب نے پیرہن میں جب عطر ملا
اور پان چبا کے اپنے گھر سے وہ چلا

آنکھ مستی کی بھری شوخ نگاہیں چنچل
قہر کا جل کی کھچاوٹ مسی و پان پری

دمڑی کے پان دمڑی کے مسی منگاؤں گی
باقی رہی چھدام سو پانی بھراؤں گی

جو اور کسی کا مان رکھے تو اس کو بھی ارمان ملے
جو پان کھلا دے پان ملے جو روٹی دے تو نان ملے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

4 ۔ بہادر شاہ ظفر

پان کھا کر سرمہ کی تحریر پھر کھینچی تو کیا
جب مرا خوں ہو چکا شمشیر پھر کھینچی تو کیا

پان کی سرخی نہیں لب پر بت خوں خوار کے
لگ گیا ہے خون عاشق منہ کو اس تلوار کے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

5 ۔ بیخود دہلوی

روٹھ بیٹھے ہیں مگر چھیڑ چلی جاتی ہے
کبھی پیغام کبھی پان چلے آتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

6 ۔ اکبر الٰہ آبادی

غیروں کو اپنے ہاتھ سے ہنس کر کھلا دیا
مجھ سے کبیدہ ہو کے کہا پان لیجئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

7 ۔ ظہیر دہلوی

پان بن بن کے مری جان کہاں جاتے ہیں
یہ مرے قتل کے سامان کہاں جاتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

8 ۔ مصحفی غلام ہمدانی 

میں بھی تو دوست دار تمہارا ہوں میری جاں
میرے بھی ہاتھ سے تو کبھو پان لیجئے

گر مزہ چاہو تو کترو دل سروتے سے مرا
تم سپاری کی ڈلی رکھتے ہو ناحق پان میں

سدا پان کھا کھا کے نکلے ہے باہر
زمانے میں خوں خوار پیدا ہوا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

9 ۔ شاہ نصیر

منہ لال ہوا غنچہ صفت خون جگر سے
ہاتھوں سے ترے پان نہ کھایا تو ہوا کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

10 ۔ بشیر بدر

سنا کے کوئی کہانی ہمیں سلاتی تھی
دعاؤں جیسی بڑے پان دان کی خوشبو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

11 ۔ محسن خان محسن

نہیں وہ پان سے کرتے ہیں سرخ سوت کا منہ
لگاتے ہیں دل بسمل میں ایک چرکا سا

دیکھنا پان کی جا خاک نہ بھر دوں منہ میں
شیخ الجھے تو موا خاک بہ سر آپ سے آپ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

12 ۔ مادھو رام جوہر

ہاتھ میں لے کر گلوری مجھ کو دکھلا کر کہا
منہ تو بنوائے کوئی اس پان کھانے کے لیے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

13 ۔ شاہ نصیر

منہ لال ہوا غنچہ صفت خون جگر سے
ہاتھوں سے ترے پان نہ کھایا تو ہوا کیا

اس لب کا لیا بوسہ نہ کبھو ہیہات نہ لپٹا پاؤں سے
دل تجھ سے برنگ پان و حنا یہ بھی نہ ہوا وہ بھی نہ ہوا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

14 ۔ شیخ ظہورالدین حاتم

تیرے ہونٹوں کے تئیں پان سے لال
دیکھ کر خون جگر کھاتا ہوں

ہوئی زباں لال ترے ہاتھ سے کھا کے بیڑا
کیا فسوں پڑھ کے کھلایا تھا مجھے پان کے بیچ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

15 ۔ میر کلو عرش

خوں بہانے کا بہانہ ہے بھلا میرے بعد
تین دن پان بھی کھانا نہ ذرا میرے بعد

غزل

عجب انداز کی یہ سالیاں ہیں
کہ منھ میں پان، لب پہ گالیاں ہیں
مری آنکھوں میں کوئی کھب گیاہے
کہ منھ پر جھولتی سی ڈالیاں ہیں
چلے کاشی کی جانب ہم توصاحب
کہ گنگا ٹٹ پہ پٹنے والیاں ہیں
عجب ترتیب سے پھوٹی ہے کونپل
سجل کتنی کنواری ڈالیاں ہیں
کہ سر دھنتے ہیں محبوب الہیٰ
غضب خسرو تری قوالیاں ہیں​

(ماخوذ)