Thursday 16 November 2017

انبیاء کی قبور کی کیا حقیقت ہے؟

سرہند پنجاب میں انبیاء کی قبور کی کیا حقیقت ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال
۔۔۔۔۔۔۔۔۔۔
حضرت مجدد الف ثانی رحمہ اللہ علیہ سے منسوب سرہند "براس" میں انبیائے کرام علیہم الصلوۃ والسلام کی قبروں کی حقیقت کیا ہے؟
ایس اے ساگر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
الجواب وباللہ التوفیق
سرہند پنجاب  سے قریب  پندرہ میل دور  "براس" میں انبیاء کرام کی قبروں کا صحیح علم یقینی ذرائع اور دلائل قطعیہ سے ثابت نہیں ہے۔ ہاں مجدد الف ثانی رحمہ اللہ کے کشف ومکاشفہ کے ذریعہ اس کا پتہ چلا ہے کہ یہاں انبیاء کی قبریں تھیں۔ بعد مکاشفہ قبر نما ڈھانچہ بنادیا گیا۔ جو نو عدد قبریں دکھائی جاتی ہیں وہ پہلے سے ان شکلوں میں موجود نہ تھیں۔
کشف کوئی دلیل شرعی قطعی  نہیں۔ یہ ایک ظنی ذریعہ علم ہے جس میں مجاہدات ومحنت شاقہ کے بعد حجابات اٹھ جاتے ہیں اور بندہ کو بعض مخفی چیزوں کا علم بطور القاء والہام  ہوجاتا ہے۔
کشف کوئی دلیل شرعی نہیں۔ دلیل شرعی قرآن وحدیث ہے۔ اسی کا لوگوں کو مکلف بنایا گیا ہے۔ کشف کا نہیں!
اور خودکشف نہ صاحب کشف کے اوپر حجت ہے نہ غیروں پہ۔ اس سے قطعی طور پہ کوئی شرعی حکم ثابت نہیں ہوسکتا۔ فن تصوف میں کشف کے مختلف درجات ہیں۔کشف ومکاشفہ دلیل ولایت نہیں ہے۔ بلکہ اتباع سنت دلیل ولایت ہے۔ بعض دفعہ کفار ومشرکین کو بھی کشف ہوجاتا ہے ۔۔۔۔۔۔الغرض مکاشفات سے قطعیت کے ساتھ کسی چیز کا فیصلہ نہیں کیا جاسکتا۔ ہاں احتمالات ضرور رہتے ہیں کہ وہ چیز سچی بھی ہوجائے!
لہذا سرہند کے بعض علاقے میں انبیاء کی قبروں کی دریافت بذریعہ کشف ہوئی ہے۔کسی تاریخی روایات یا حدیث سے تعیینی طور پہ ایسا کچھ بھی ثابت نہیں ہے۔
واللہ اعلم بالصواب
شکیل منصور القاسمی

No comments:

Post a Comment