بینک کے ملازم کی کمائی مسجد میں لگانا؟

بینک کے ملازم کی کمائی مسجد میں لگانا؟
السلام علیکم!
مسجد کی کمیٹی کے ممبران بینک میں نوکری کرتے ہیں تو کیا انکی دی ہوئی رقم کو مسجد کی تعمیرات کے کام یا اور کسی قسم کے کام مثلاً قالین وغیرہ میں استعمال کیا جاسکتا ہے؟ کیا فرماتے ہیں اس بارے میں مفتیان کرام.
جزاکم اللہ خیرا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
الجواب وباللہ التوفیق: 
بینک اپنے ملازمین کو سودی رقم سے تنخواہ دیتا ہے
اگر بینک میں ناجائز ملازمت کرنے والے احباب اپنی اسی تنخواہ سے حاصل شدہ رقوم مسجد میں لگائیں تو یہ ناجائز ہے، اللہ تعالی خود پاک وطیب ہیں اور پاک مال ہی اپنے گھروں کے لئے قبول کرتے ہیں
عن أبي ہریرۃ رضي اللّٰہ عنہ قال: قال رسول اللّٰہ صلی اللّٰہ علیہ وسلم: من تصدق بعدل تمرۃ من کسب طیب، ولا یقبل اللّٰہ إلا الطیب، فإن اللّٰہ یتقبلہا بیمینہ، ثم یربّیہا لصاحبہ کما یربي أحدکم فلوّہ حتی تکون مثل الجبل۔ (صحیح البخاري، کتاب الزکاۃ / باب الصدقۃ من کسب طیب رقم: ۱۴۱۰ دار الفکر بیروت)
أما لو أنفق في ذٰلک مالاً خبیثًا ومالًا سببہ الخبیث الطیب فیکرہ؛ لأن اللّٰہ تعالیٰ لا یقبل إلا الطیب، فیکرہ تلویث بیتہ بما لا یقبلہ۔ (شامي، کتاب الصلاۃ / مطلب: کلمۃ لا بأس دلیل علی المستحب غیرہ؛ لأن البأس الشدۃ ۱؍۶۵۸ کراچی، ۲؍۴۳۱ زکریا، کذا في حاشیۃ الطحطاوي علی الدر المختار / باب ما یفسد الصلاۃ وما یکرہ فیہا ۱؍۲۷۸ دار المعرفۃ بیروت)
ہاں اگر بینک ملازم اپنی دوسری حلال ذریعہ آمدنی (وراثت یا ہدیہ وغیرہ) سے حاصل شدہ مال مسجد میں لگائیں تو البتہ لینے کی گنجائش ہے۔
واللہ اعلم
شکیل منصور القاسمی