جمعہ کا مسبوق کیا کرے؟

جمعہ کا مسبوق کیا کرے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال
۔۔۔۔۔۔۔۔۔۔۔

ایک مسئلہ اور ہے کہ
اگر جمعہ کے نماز کی پہلی رکعت چھوٹ جائے تو کیا جمعہ کی نماز ہوگی یا نہیں؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
الجواب وباللہ التوفیق

ائمہ ثلاثہ اور حنفیہ میں امام محمد کے یہاں جمعہ پانے کے لئے کم سے کم ایک رکعت پانا ضروری ہے ۔اگر کوئی  دوسری رکعت کے رکوع کے بعد یا التحیات میں آکے امام کے ساتھ شریک ہوا تو ان حضرات کے یہاں اب اس پہ جمعہ نہیں ہے بلکہ وہ سلام پہیرنے کے بعد کھڑا ہوکے اسی تکبیر تحریمہ کے ساتھ  ظہر کی  نماز چار رکعت پڑھے۔
جبکہ امام ابوحنیفہ اور ابویوسف کا مذہب یہ ہے کہ تسلیم امام سے پہلے پہلے جو بھی شریک جماعت ہوجائے تو وہ امام کے سلام پھیرنے کے بعد کھڑا ہوکے جمعہ ہی پڑھے گا ظہر کی نماز نہیں۔
حنفیہ کے پیش نظر یہ حدیث ہے ۔ماادرکتم فصلوا ومافاتکم فاقضوا ۔صحیح ابن حبان میں ہے۔

إذا أتَيْتُم الصَّلاةَ فلا تأتوها تسعَوْن وائتوها وعليكم السَّكينةُ فما أدرَكْتُم فصلُّوا وما فاتكم فاقضوا .
الراوي: أبو هريرة المحدث: ابن حبان - المصدر: صحيح ابن حبان - الصفحة أو الرقم: 2145
خلاصة حكم المحدث: أخرجه في صحيحه

یعنی امام کے ساتھ جتنی نماز بھی ملے اسے پڑھ لو اور جو چھوٹ جائے وہ بعد سلام پورا کرو ۔
یہ حدیث صحیح الاسناد ہے اور  جمعہ سمیت تمام نمازوں کو شامل ہے۔اعلاء السنن ج 8 ص 82  میں التلخیص الحبیر کے حوالے سے شیخین کے قول کو اقوی وارجح کہا گیا ہے۔
صورت مسئولہ میں اگر دوسری رکعت کے رکوع تک امام کو پالیا تو باتفاق ائمہ اربعہ  اسے جمعہ مل گئی۔لیکن اگر دوسری رکعت کے رکوع کے بعد شامل ہوا تو حنفیہ کے راجح قول کے مطابق تو پھر بھی جمعہ مل گئی۔ لیکن ائمہ ثلاثہ اور امام محمد کے نزدیک اب جمعہ نہ ملی۔وہ سلام امام کے بعد کھڑا ہوکے اسی تحریمہ سے چار رکعت ظہر کی پڑھے ۔
واللہ اعلم بالصواب
شکیل منصور القاسمی