جنازہ امام کے روبرو کس چیز پہ رکھا جائے؟

جنازہ امام کے روبرو کس چیز پہ رکھا جائے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال
۔۔۔۔۔۔۔۔۔

حضرت، ایک مسئلہ دریافت کرنی ہے، میت کو امام جنازہ سے کتنی اونچائی پر رکھ سکتے ہیں، جبکہ کتابوں میں میت کے سینہ کے مقابلے میں کھڑا ہو، ایک جگہ جنازہ گاہ زمین سے چار فٹ اونچائی پر ہے، کیا یہ درست ہے،
عبد الباسط قاسمی۔ 

بیگوسرائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
الجواب وباللہ التوفیق
جنازہ کی نماز کی صحت کے لئے مذہب حنفیہ میں جنازہ کا امام کے روبرو ہونا ضروری ہے۔ جنازہ روبرو نہ ہو تو نماز جنازہ درست نہیں۔
بہتر یہ ہے کہ امام جنازہ کے سینہ کے مقابل کھڑا ہو۔ کیونکہ یہ مرکز نور ایمان ہے۔
1979 أَخْبَرَنَا عَلِيُّ بْنُ حُجْرٍ قَالَ أَنْبَأَنَا ابْنُ الْمُبَارَكِ وَالْفَضْلُ بْنُ مُوسَى ح وَأَخْبَرَنَا سُوَيْدٌ قَالَ أَنْبَأَنَا عَبْدُ اللَّهِ عَنْ حُسَيْنٍ الْمُكْتِبِ عَنْ عَبْدِ اللَّهِ بْنِ بُرَيْدَةَ عَنْ سَمُرَةَ بْنِ جُنْدُبٍ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ صَلَّى عَلَى أُمِّ فُلَانٍ مَاتَتْ فِي نِفَاسِهَا فَقَامَ فِي وَسَطِهَا
سنن النسائی

روبرو ہونا عام ہے خواہ تخت وچار پائی پہ ہو یا زمین پہ۔ دونوں کا حکم یکساں ہے۔
لیکن چونکہ نماز کی صحت کے لئے مردہ کے کپڑے اور بدن کی طہارت کے ساتھ جگہ کی طہارت بھی ضروری ہے۔ اس لئے طہارت مکان کی شرطیت  کے پیش نظر چارپائی وغیرہ پہ ہونا زیادہ بہتر اور اولی ہے۔ فتاوی قنیہ وغیرہ میں زمین پہ ہونے کی صورت میں جو عدم جواز کی بات کہی گئی ہے وہ راجح نہیں ہے کیونکہ کفن کی کئی تہ مردہ اور زمین کے درمیان حائل ہے۔ زمین کی نجاست موثر نہیں ہوسکتی۔ مراقی الفلاح میں ہے

والرابع حضوره أو حضور أكثر بدنه أو نصفه مع رأسه  وطهارة مكانه الخ........مع حاشية الطحطاوي على المراقي. صفحة 580.ط ديوبند .
پہر اس چار پائی کی اونچائی کی کوئی تحدید نصوص فقہیہ میری نظروں سے کہیں نہیں گزری ہے کہ کتنی بلندی چاہئے؟ بس سطح زمین سے اوپر ہونا کافی ہے۔ اصح قول كے مطابق ضروری یہ بھی نہیں۔

واللہ اعلم بالصواب
شکیل منصور القاسمی