Wednesday 25 July 2018

تین بار قل ھو اللہ پڑھنے سے پورے قرآن کا ثواب؟

تین 
بار قل ھو اللہ پڑھنے 
سے پورے قرآن کا ثواب؟
بقلم: شکیل منصور القاسمی 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

قرآن کریم کائنات کی عظیم ترین دولت اور نعمت ہے۔ زمین آسمان میں خدا کو سب سے محبوب چیز قرآن کریم ہے۔ اس کی حفاظت کی ذمہ داری خدا نے خود اپنے ذمہ لی ہے۔ اس میں دنیا وآخرت کی بھلائی اور ہدایت ہے۔ اس کا پڑھنا بھی عبادت، سننا بھی عبادت، اور دیکھنا بھی عبادت۔
یہ کتاب تمام آسمانی کتابوں کا عرق وخلاصہ ہے۔ پچھلی امتوں کو بغرض اصلاح جو مضامین مختلف زمانوں میں دیئے گئے وہ سب قرآن کریم میں جمع کردیئے گئے۔ مسند الہند حضرت شاہ ولی اللہ صاحب محدث دہلوی رحمہ اللہ کے بقول:
1۔۔ ذات باری میں غور وفکر ۔
2۔۔ صفات باری میں غور وفکر ۔
3۔۔ افعال باری میں غور وفکر ۔
4۔۔ انجام عمل میں غور وفکر ۔
5۔۔ موت اور اس کے ما بعد کے حالات میں غور وفکر ۔
پانچوں انواع تفکر وتدبر قرآن میں بیان کردیئے گئے ہیں جو اگلی امتوں کو مختلف اوقات میں بتائے گئے تھے۔
اسی لئے تلاوت قرآن کی مختلف شکلوں میں ترغیب دی گئی ہے۔ اور اسی وجہ سے  مخصوص سورتوں اور آیتوں کے فضائل بھی الگ الگ بیان کئے گئے ہیں۔ مثلا ایک روایت میں قرآن کریم کی آیتوں کے پڑھنے اور سیکھنے کو موٹی ،تازی اور اونچی کوہان والی اونٹنیوں سے بہتر قرار دیا گیا (مشکوة حدیث نمبر 2110 )۔۔۔۔۔ اور دوسری حدیث میں نماز میں تین آیتیں پڑھنے کو جاندار گابھن اونٹنیوں سے بہتر قرار دیا (مشکوة 2111) ۔۔۔۔۔۔ قرآن میں مہارت حاصل کرنے والے کو فرشتوں کے ساتھ تشبیہ دی گئی (ایضا 2112) ۔۔۔۔۔۔۔ قرآن کے ایک ایک حرف پڑھنے پر دس نیکیاں دی گئیں۔ (مشکو ة2137) ۔۔۔ قرآن سے تعلق رکھنے والے مومن کو ترنج لیمون کے ساتھ اور قرآن نہ پڑھنے والے منافق کو اندرائن سے تشبیہ دی گئی۔(مشکوہ 2114 ) ۔۔۔۔
پ
ھر تمثیلی پیرایہ بیان میں قرآن کو بروز قیامت جھگڑنے والا بتایا گیا ہے جو اپنے پڑھنے والے کی طرف سے جھگڑ کر داخل جنت کروادے گا۔ (مشكوة 2120) ..وغیرہ وغیرہ ۔
اس کے علاوہ بیشمار روایتوں میں تلاوت قرآن کے فضائل بیان کئے گئے ہیں۔ لیکن ساتھ ہی بعض آیتوں اور سورتوں کی فضیلت اور امتیاز زیادہ بتایا گیا ہے۔ تاکہ بطور وظیفہ لوگ انہیں اختیار کریں۔ مثلا آیت الکرسی، سورہ الحشر کی تین آیتیں، اور سورہ اخلاص کی بڑی فضیلت بیان کی گئی ہے۔ اور ان کا درجہ قرآن میں ایسا ہے جیسے اسمائے الہیہ میں "اسم اعظم" کا۔ کیوں کہ ان میں صفات الہیہ میں غور وفکر کی بات ہے۔ سورہ فاتحہ وبقرہ میں عبادت میں غور وفکر کی بات ہے اس لئے ان کو مقدم رکھا گیا اور قرآن کا کوہان قرار دیا گیا۔ سورہ یاسین کو قرآن کا دل اس لئے کہا گیا کہ اس میں انواع تدبر کے پانچوں انواع جمع ہیں۔
سب سے ذیادہ فضائل سورہ اخلاص کے آئے ہیں۔ بعض اہل علم کی تحقیق کے مطابق اس کے فضائل کی روایتیں تواتر کو پہنچی ہوئی ہیں۔
اہمیت کے پیش نظر ہم ذیل کی سطروں میں ایک ترتیب سے ان تمام روایتوں کا احصاء کررہے ہیں پھر اقوال علماء کی روشنی میں ان کی توجیہات بھی پیش کی جائیں گی۔

1۔۔۔ ابوسعید خدری 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن أبي سعيد الخدري أن رجلا سمع رجلا يقرأ (من السحر) قل هو الله أحد (كلها) يرددها -لايزيد عليها - فلما أصبح جاء إلى رسول الله صلى الله عليه وسلم فذكر ذالك له -وكان الرجل يتقالها -فقال رسول الله صلى الله عليه وسلم والذى نفسي بيده إنها لتعدل ثلث القرآن. (1) .

2۔۔۔۔ وعنہ 
۔۔۔۔۔۔۔۔۔۔۔۔۔۔۔۔۔
وعنه أن النبي صلى الله عليه وسلم قال ايعجز أحدكم أن يقرأ ثلث القرآن في ليلة !قال فشق ذالك على أصحابه فقالوا من يطيق ذالك ؟قال يقرا قل هو الله أحد فهى ثلث القرآن (2 ).

3۔۔۔۔ ابوہریرہ 
۔۔۔۔۔۔۔۔۔۔۔۔۔۔۔۔۔۔۔۔۔۔
عن أبي هريرة قال قال رسول الله صلى الله عليه وسلم احشدوا فإني ساقرا عليكم ثلث القرآن. فحشد من حشد ثم خرج فقرأ قل هو الله أحد (الله الصمد.حتى ختمها )ثم دخل فقال بعضنا لبعض هذا خبر جاءه من السماء فذكر الذي أدخله ثم خرج ( إلينا رسول الله ) فقال قدقلت لكم إني ساقرء عليكم ثلث القرآن وأنها تعدل ثلث القرآن (3).
4۔۔۔ ابوالدرداء 
۔۔۔۔۔۔۔۔۔۔۔۔۔۔۔۔۔۔۔۔۔
عن أبي الدرداء ان النبي صلى الله عليه وسلم قال ايعجز أحدكم أن يقرأ ثلث القرآن في ليلة؟ قيل يارسول الله ومن يطيق ذالك ؟قال اقرؤا قل هو الله أحد (تعدل ثلث القرآن ).إن الله عزوجل جزء القرآن ثلاثة أجزاء فجعل قل هو الله أحد جزءا من أجزاء القرآن. (4 ).

5۔۔۔ ابوایوب 
۔۔۔۔۔۔۔۔۔۔۔۔۔۔۔۔۔
عن أبي أيوب عن النبي صلى الله عليه وسلم قال ايعجز أحدكم أن يقرأ ثلث القرآن في ليلة؟ فإنه من قرء قل هو الله أحد الله الصمد فى ليلة فقد قرأ ليلتئذ ثلث القرآن. (5).

6۔۔۔ عبد اللہ بن مسعود 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن ابن مسعود قال قال رسول الله صلي الله عليه وسلم ايعجز أحدكم أن يقرأ كل ليلة ثلث القرآن؟ قالوا ومن يطيق ذالك؟ قال بلى !قل هو الله أحد. (6)
7۔۔۔ ابومسعود بدری 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن أبي مسعود البدري أن النبي صلى الله عليه وسلم قال ايغلب أحدكم أن يقرأ ثلث القرآن كل ليلة ؟قلنا ومن يطيق ذالك يا رسول الله؟ قال قل هو الله أحد ثلث القرآن. (7).
8۔۔ ابی بن کعب 
۔۔۔۔۔۔۔۔۔۔۔۔۔۔۔۔۔۔۔۔۔
عن أبي بن كعب قال قال رسول الله صلي الله عليه وسلم من قرأ ب قل هو الله أحد فكانما قرأ ثلث القرآن (8 ).
9۔۔۔۔ ام کلثوم بنت عقبہ 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن أم كلثوم بنت عقبة أن رسول الله صلي الله عليه وسلم سئل عن قل هو الله أحد فقال ثلث القرآن أو تعدله.(9 ).
10۔۔ عبد الرحمن بن عوف 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن عبد الرحمن بن عوف أن رسول الله سئل عن قل هو الله أحد فقال ثلث القرآن أو تعدله. (10).
11۔۔۔ عبد اللہ بن عمر 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن بن عمر قال ايعجز أحدكم أن يصلى في ليلة ولو بثلث القرآن؟ قال إقرأ قل هو الله أحد فإنها تعدل ثلث القرآن. (11) موقوف في حكم المرفوع .
12۔۔ عمرو بن العاص 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن عبد اللہ بن عمرو بن العاص ان ابا ایوب الانصاری كان في مجلس وهو يقول الا يستطيع أحدكم أن يقوم بثلث القرآن كل ليلة ؟ قالوا وهل نستطيع ذالك ؟قال فإن قل هو الله أحد ثلث القرآن. قال فجاء النبي صلى الله عليه وسلم وهو يسمع اباايوب فقال رسول الله صدق أبو أيوب. (12) 
13۔۔ انس بن مالک 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن أنس بن مالك قال قال رسول الله صلي الله عليه وسلم قل هو الله أحد تعدل ثلث القرآن. (13)
14۔۔۔ معاذبن جبل 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن معاذ بن جبل قال قال رسول الله صلي الله عليه وسلم قل هو الله أحد تعدل ثلث القرآن (14)
15۔۔ سعد بن ابی وقاص 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن سعد بن أبي وقاص مرفوعا من قرأ قل هو الله أحد فكانما قرأ ثلث القرآن. (15)
16۔۔ جابر 
۔۔۔۔۔۔۔۔۔۔۔۔۔۔۔۔
عن جابر قال قال رسول الله صلي الله عليه وسلم قل هو الله أحد تعدل ثلث القرآن. (16 ).
17۔۔۔ ابن عباس 
۔۔۔۔۔۔۔۔۔۔۔۔۔۔۔۔۔۔۔۔۔
عن ابن عباس مرفوعا قل هو الله أحد ثلث القرآن. (17)
18۔۔۔۔ نعمان بن بشیر 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن النعمان بن بشير مرفوعا من قرأ قل هو الله أحد مرة فكانما قرأ ثلث القرآن. (18).
19۔۔ ابوامامہ باہلی 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن أبي امامةالباهلي قال قال رسول الله صلي الله عليه وسلم ايعجز أحدكم أن ياوى إلى فراشه حتى يختم القرآن. قيل يارسول الله وكيف يختم القرآن؟ قال يقرأ قل هو الله أحد ثلث مرات (19)
20۔۔ رجاء غنوی 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن رجاء الغنوي يقول قال رسول الله صلي الله عليه وسلم من قرأ قل هو الله أحد ثلث مرات فكأنما ختم القرآن كله (20) 
21۔۔ عثمان بن عفان 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن عثمان بن عفان في رقية النبي وقوله له فإنها تعدل ثلث القرآن. (21)
22۔۔ کعب بن عجرہ 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن كعب بن عجرة أنها تعدل بثلث القرآن (22)
23۔۔رافع بن خدیج 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عن رافع بن خديج أنها تعدل بثلث القرآن (23).
مراسیل 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
24۔۔۔ ثابت بنانی ....يعدل ثلث القرآن (24).
25۔۔ ابراہیم نخعی يعدل ثلث القرآن (25).
26۔۔ حمید بن عبد الرحمن بن عوف ۔۔يعدل ثلث القرآن (26).
27۔۔ ابن شھاب ...يعدل ثلث القرآن (27)
28۔۔ ابن ابی لیلی .....قل هو الله أحد يعدل ثلث القرآن (28).
29۔۔ عمرو بن میمون ...يعدل ثلث القرآن (29).
30۔۔ عبید بن عمیر ... يعدل ثلث القرآن. (30).
31۔۔ عطاء ...يعدل ثلث القرآن. (31) 
32۔۔ عاصم...يعدل ثلث القرآن. (32)
33۔۔ اسحاق بن ابی فروہ ....يعدل ثلث القرآن. (33).

سورہ اخلاص کے ثلث قرآن کے مساوی ہونے کے بارے میں مذکورہ روایات آپ نے دیکھ لیں۔ صرف حدیث نمبر 19 اور 20 کے رواة ائمہ جرح وتعدیل کا کلام ہے۔انیسویں حدیث کی سند میں "سعید بن ملک حرانی" کو امام ذہبی نے کذب سے موسوم کیا ہے۔ جبکہ دارقطنی نے انہیں ناقابل احتجاج مانا ہے (اللسان 37/3۔۔۔۔الضعفاء 263/1) ۔
بیسویں نمبر کی حدیث کی سند میں "حارث غسانی" ہیں۔ ابوحاتم ان کو متروک الحدیث، امام بخاری "فیہ نظر" اور عقیلی غیرمعتمد کہتے ہیں۔ دیکھئے لسان المیزان 148/1۔۔ ضعفاء العقیلی 125/1۔)
علاوہ ازیں "رجاء غنوی" کا صحابی ہونا بھی متحقق نہیں۔

ثلث قرآن ہونے کا مطلب 
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ صلی اللہ علیہ وسلم سے یہ ثابت نہیں ہے کہ قل ھو اللہ احد کس اعتبار سے ثلث قرآن ہے ؟؟
حضرات محدثین کرام نے اس مثلیت کی مختلف توجیہات بیان کی ہیں۔
ابو العباس بن سریج فرماتے ہیں کہ مضامین قرآن کریم کی تین قسمیں ہیں
1۔۔۔ ایک ثلث تو اس میں احکام کا ہے۔
2۔۔۔ دوسرا ثلث وعد ووعید کا ہے
3۔۔۔ اور تیسرا ثلث اسماء وصفات باری پر مشتمل ہے۔ (34)۔
سورہ اخلاص اس تیسری قسم پر مشتمل ہے اس لئے اس کو ثلث قرآن کے مساوی قرار دیا گیا۔
شیخ الاسلام علامہ ابن تیمیہ نے اس توجیہ کو بہتر قرار دیا ہے۔
علامہ ابن الجوزی کا کہنا ہے کہ اللہ تعالی کی معرفت تین طرح کی ہے
1۔۔۔ ذات باری کی معرفت۔
2۔۔ اسماء وصفات باری کی معرفت۔
3۔۔۔ افعال باری کی معرفت۔
سورہ اخلاص ذات باری پر مشتمل ہے۔ اس لئے اس کو ثلث قرآن قرار دیا (35)۔
امام غزالی رحمہ اللہ فرماتے ہیں کہ قرآن کریم کے تین مہمات ہیں
1۔۔ اللہ کی معرفت۔
2۔۔۔ آخرت کی معرفت۔
3۔۔۔ صراط مستقیم کی معرفت۔
اصل معرفت یہی تین ہیں باقی توابع ہیں۔ سورہ اخلاص ان میں سے ایک یعنی اللہ کی معرفت پر مشتمل ہے۔ اس لئے اس کو ثلث قرآن قراردیا گیا۔ (36)۔
امام مازری رحمہ اللہ فرماتے ہیں کہ قرآن کریم تین مضامین پر مشتمل ہے۔
1۔۔ قصص۔
2۔۔ احکام ۔
3۔۔ اللہ کے اوصاف ۔
سورہ اخلاص میں تیسرا مضمون ہے۔ اس لئے اس کو ثلث قرآن قراردیا گیا۔ (37)۔
بعض علماء کی رائے ہے کہ اس کا ثواب ثلث قرآن کے برابر ہے۔ جبکہ بعض دیگر کا خیال ہے کہ یہ فضیلت صاحب واقعہ کے ساتھ خاص ہے۔
کچھ حضرات فرماتے ہیں کہ جس نے اس سورہ کے مضامین یعنی توحید اور اذعان  بالخالق پر عمل کیا یعنی اللہ ہر ایمان رکھا وہ حصول مقصد میں اس شخص کی طرح ہے جس نے ثلث قرآن پڑھا۔
حافظ ابن عبدالبر فرماتے ہیں کہ رسول اللہ صلی اللہ علیہ وسلم کی بیان کردہ فضیلت پر یقین رکھنا چاہئے اور اپنی رائے سے کوئی توجیہ نہیں بیان کرنی چاہئے کہ سورہ اخلاص ثلث قرآن کے برابر کیوں اور کیسے ہے؟؟؟ یعنی یہ متشابہات میں سے ہے۔ جس کی کھود کرید کرنا منع ہے۔ (38) ۔

الغرض رسول اللہ صلی اللہ علیہ وسلم سے یہ تشریح ثابت نہیں کہ سورہ اخلاص کے ثلث قرآن ہونے سے کیا مراد ہے؟؟ اور یہ کس اعتبار سے ثلث قرآن ہے؟؟ ثواب میں برابر ہونا علماء کی توجیہات متعددہ میں سے ایک توجیہ ہے۔ جبکہ راجح توجیہ یہ ہے کہ مضامین قرآن کے ایک ثلث کے برابر ہے۔ اگر ثواب والی توجیہ ہی اختیار کی جائے تو پھر اس میں مختلف احتمالات ہیں جو درج ذیل ہیں: 
محدث عصر حافظ الحدیث علامہ سید محمد انور شاہ کشمیری کی رائے کا خلاصہ یہ ہے کہ ثواب کی دو قسمیں ہیں:
ایک ثواب اصلی اور دوسرا ثواب تضعیفی وفضلی ۔۔۔۔ سورہ اخلاص کی تلاوت جو شخص کرتا ہے اس کو اس کا اجر اصلی بھی ملتا ہے اور اس اجر اصلی کو بڑھا چڑھا کر اتنا کردیا جاتا ہے کہ ثلث قرآن کے ثواب اصلی کے مساوی ہوجاتا ہے۔
یعنی اس کا اجر اصلی اور اجر تضعیفی مل کر قرآن مجید کے ثلث کے اجر اصلی کے ثلث کے مساوی ہوجاتا یے۔یہ مطلب نہیں کہ اس کا اجر اصلی ثلث قرآن کے اجراصلی کے برابر ہوتا ہے۔یا اس کا اجر تضعیفی ثلث قرآن کے اجر تضعیفی کے برابر ہے۔یا اس کا اجر اصلی اور تضعیفی مل کر ثلث قرآن کے اجر اصلی اور تضعیفی کے برابر ہے۔ (39)۔
شیخ الاسلام ابن تیمیہ بھی تقریبا یہی فرماتے ہیں۔ انہوں نے تقریب فہم کے لئے محسوسات میں اس کی مثال بیان فرمائی ہے کہ ایک مثلا ایک شخص کے پاس مسکن، طعام ،لباس اور کچھ نقدی موجود ہے جس کی مالیت ایک لاکھ روپے کے برابر ہے۔ اور دوسرے شخص کے پاس مسکن، طعام اور لباس کچھ نہیں ہے۔ البتہ ایک لاکھ روپے کی نقدی موجود ہے۔ اب دوسرا شخص باوجودیکہ اس کے پاس پہلے شخص کے کل سامان کی قیمت کے برابر نقدی موجود ہے ان چیزوں کا محتاج ہے جو پہلے شخص کے پاس ہیں اور پہلے شخص کے پاس ضرورت کی ہر چیز موجود ہے وہ دوسرے کا محتاج نہیں۔ اسی طرح سورہ اخلاص تین بار پڑھنے والے کو اجروثواب کی انواع مختلفہ میں سے صرف ایک نوع حاصل ہے۔ وہ بقیہ قرآن کی تلاوت پر ملنے والے اجروثواب کی انواع مختلفہ کا محتاج ہے اور جو پورا قرآن بالترتیب پڑھتا ہے اسے تمام انواع حاصل ہیں۔ وہ کسی کا محتاج نہیں (40)۔

اگر مثلیت کو ثواب ہی پر محمول کیا جائے پھر بھی کسی حدیث میں یہ نہیں آیا ہے کہ قل ہو اللہ احد قرآن کا ثلث مطلق ہے یا ثلث معین؟؟۔ اگر کسی دلیل سے اس کا ثلث مطلق ہونا ثابت ہوجائے تو یہ کہاجاسکتا ہے کہ تین بار پڑھ لینے سے تین ثلث کا ثواب مل گیا اور تین ثلث کا مجموعہ پورا قرآن ہوا۔ مگر اس کی کوئی دلیل نہیں ۔بلکہ احتمال ہے کہ وہ خاص ثلث مراد ومتعین ہو جو مشتمل یے توحید کے مضمون پر۔ لہذا اگر کوئی اس کو تین بار پڑھا تو صرف یہ لازم آیا کہ گویا اس نے حصہ توحید کو تین بار پڑھلیا۔ تو ایک حصہ کو چند بار پڑھ لینے سے کسی طرح لازم نہیں آتا کہ گویا پورا قرآن پڑھ لیا۔ جیسے کسی نے ایک پارہ تیس مرتبہ پڑھ لیا تو اس کے معنی یہ ہیں کہ اس نے سارا قرآن پڑھ لیا ؟؟؟؟۔ اسی لئے حضرت امام احمد بن حنبل اوراسحاق بن راہویہ فرماتے ہیں کہ تین بار قل ھو اللہ پڑھنے سے پورے قرآن کا ثواب تو دور رہا اگر کوئی دوسو بار بھی پڑھ لے پھر بھی پورے قرآن کا ثواب نہیں مل سکتا! لا أن قرأتها ثلث مرات كقراءة القرآن. فإن هذا لايستقيم. ولو قرأها  ماتى مرة. (فتح الملہم حدیث نمبر 1856۔ جلد 5۔ صفحہ 193)۔
حکیم الامت مرشد تھانوی قدس سرہ شاہ اسحاق صاحب رحمہ اللہ کے حوالہ سے تحریر فرماتے ہیں:
کسی بھی چیز کے تین ثلث ہونے کی دو صورتیں ہیں۔ ایک تو یہ ہے ایک چیز علیحدہ علیحدہ تین ٹکڑے کرلئے جائیں۔ ایسے تین ثلث کو اگر ملادیا جائے تو اس سے وہ شئے پوری ہوجاتی ہے۔
دوسری صورت یہ ہے کہ ایک ہی ثلث تین دفعہ مکرر ہو۔ مثلا کوئی شخص ابتدائی دس پاروں کو تین دفعہ پڑھے تو یہ تو کہا جائے گا کہ اس نے قرآن کے ایک ثلث کو تین بار پڑھ لیا مگر یہ نہ کہا جائے گا کہ پورا قرآن شریف پڑھا۔ (41)۔

اسی طرح اس جگہ دوسرا یہ بھی احتمال ہے کہ قرآن کریم کے مقاصد تین ہیں: توحید. رسالت۔ آخرت ۔
تو توحید چونکہ تین مقاصد میں سے ایک ہے۔ اس لئے وہ ثلث قرآن ہے۔ اور اخلاص کا پڑھنا گویا توحید کی کل آیتوں کوپڑھنا ہے۔ کیونکہ اس میں صرف توحید کا بیان ہے۔ تین مرتبہ پڑھلینے سے توحید کا تکرار تین مرتبہ سمجھا جائے گا۔ باقی دو مقاصد ومضامین کا ثواب سورہ اخلاص پڑھنے سے حاصل نہیں ہوسکتا۔ (42)۔

خلاصہ کلام 
۔۔۔۔۔۔۔۔۔۔۔۔۔۔۔۔۔۔۔۔
حاصل یہ ہے کہ تین بار سورہ اخلاص پڑھ لینے سے کامل قرآن پڑھ لینے کا ثواب ملنا صحیح، معتمد اور مستند حدیث سے ثابت نہیں ہے۔ صرف احتمال ہے۔ اور محض احتمال کی بنیاد پر بقیہ قرآن سے صرف نظر کرنا اور بالترتیب تلاوت نہ کرنا کسی بھی طرح معقول نہیں۔ رسول اللہ صلی اللہ علیہ وسلم کا مقصد بیان فضیلت  سے اس سورہ کا مہتم بالشان ہونا بیان کرنا ہے۔ اس کا یہ مطلب نہیں کہ یہ سورہ تین بار پڑھنا پورے قرآن کے برابر ہوجائے گا اور پورے قرآن کی تلاوت کی ضرورت باقی نہیں رہے گی۔
جیسے سورہ فاتحہ کی اہمیت بتانے کے لئے اسے بیس پارہ قرآن کے برابر کہا گیا

فاتحةُ الكتابِ تَعدِلُ ثُلُثَيِ القرآنِ
الراوي:
عبدالله بن عباس
المحدث:
ابن الملقن - المصدر: الإعلام - الصفحة أو الرقم: 3/222خلاصة حكم المحدث: إسناده ضعيف۔

تو اس کا مطلب یہ ہرگز نہیں ہے کہ اس کا ڈیڑھ حصہ پڑھ لینا پورے قرآن پڑھ لینے کے برابر ہے!
اسی طرح والدین کی خدمت کی خدمت کی اہمیت بیان کرنے کے لئے حدیث میں اس پر جہاد کا اطلاق کیا گیا ہے
1۔۔ [ص: 11] الرُّخْصَةُ فِي التَّخَلُّفِ لِمَنْ لَهُ وَالِدَةٌ

3104 أَخْبَرَنَا عَبْدُ الْوَهَّابِ بْنُ عَبْدِ الْحَكَمِ الْوَرَّاقُ قَالَ حَدَّثَنَا حَجَّاجٌ عَنْ ابْنِ جُرَيْجٍ قَالَ أَخْبَرَنِي مُحَمَّدُ بْنُ طَلْحَةَ وَهُوَ ابْنُ عَبْدِ اللَّهِ بْنِ عَبْدِ الرَّحْمَنِ عَنْ أَبِيهِ طَلْحَةَ عَنْ مُعَاوِيَةَ بْنِ جَاهِمَةَ السَّلَمِيِّ أَنَّ جَاهِمَةَ جَاءَ إِلَى النَّبِيِّ صَلَّى اللَّهُ عَلَيْهِ وَسَلَّمَ فَقَالَ يَا رَسُولَ اللَّهِ أَرَدْتُ أَنْ أَغْزُوَ وَقَدْ جِئْتُ أَسْتَشِيرُكَ فَقَالَ هَلْ لَكَ مِنْ أُمٍّ قَالَ نَعَمْ قَالَ فَالْزَمْهَا فَإِنَّ الْجَنَّةَ تَحْتَ رِجْلَيْهَا
سنن النساي. كتاب الجهاد
2۔۔۔ 15110 حَدَّثَنَا رَوْحٌ قَالَ أَخْبَرَنَا ابْنُ جُرَيْجٍ قَالَ أَخْبَرَنِي مُحَمَّدُ بْنُ طَلْحَةَ بْنِ عَبْدِ اللَّهِ بْنِ عَبْدِ الرَّحْمَنِ عَنْ أَبِيهِ طَلْحَةَ بْنِ عَبْدِ اللَّهِ عَنْ مُعَاوِيَةَ بْنِ جَاهِمَةَ جَاءَ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ فَقَالَ يَا رَسُولَ اللَّهِ أَرَدْتُ الْغَزْوَ وَجِئْتُكَ أَسْتَشِيرُكَ فَقَالَ هَلْ لَكَ مِنْ أُمٍّ قَالَ نَعَمْ فَقَالَ الْزَمْهَا فَإِنَّ الْجَنَّةَ عِنْدَ رِجْلِهَا ثُمَّ الثَّانِيَةَ ثُمَّ الثَّالِثَةَ فِي مَقَاعِدَ شَتَّى كَمِثْلِ هَذَا الْقَوْلِ
مسند المكيين.

تو اس کا یہ مطلب نہیں کہ والدین کی خدمت جہاد کے قائم مقام ہوجائے گی اور فریضہ جہاد ادا کرنے کی ضرورت باقی نہیں رہے گی۔
اسی بناء پر رسول اللہ صلی اللہ علیہ وسلم، صحابہ کرام اور علماء وصلحاء امت کا تعامل یہی چلا آرہا ہے کہ وہ بالترتیب پورے قرآن مجید کی تلاوت کرتے رہے۔ اور اسی کی تاکید کرتے رہے۔ کسی نے بھی سورہ اخلاص کی قراءت پر اکتفاء کرتے ہوئے بالترتیب تلاوت کو ترک نہیں کیا (43)۔
امام شافعی رحمہ اللہ دن میں کئی ختم قرآن بالترتیب فرمایا کرتے ۔امام اعظم سراج الامہ ابوحنیفہ رحمہ اللہ کا جس جگہ میں انتقال ہوا ہے صرف وہاں سات ہزار مرتبہ قرآن کریم ختم فرمائے تھے۔ باقی جگہوں میں کی جانے والی ختم علیحدہ ہے۔ (44) ۔۔۔
ان کا معمول تھا مہینہ میں تیس ختم قرآن فرمایا کرتے تھے۔ (45)۔
قابل غور امرہے کہ اگر سورہ اخلاص کے تین بار پرھنے سے پورے قرآن کا ثواب  مل جاتا تو اتنی زیادہ ریاضت اور محنت شاقہ کی کیا ضرورت تھی؟ ۔

حصول ثواب کے بارے میں شریعت کا مسلمہ قاعدہ اور اصول یہی ہے
من قرأ حرفا من كتاب الله فله حسنة.والحسنة بعشرامثالها .ترمذي .رقم الحديث 2910.(ہر حرف پر دس نیکی ملتی ہیں۔) ۔۔۔۔۔۔۔ اس ضابطہ سے عدول کی کوئی شرعی وجہ نہیں۔ اگر دس نیکی سے زیادہ ثواب ملتا تو آیت الکرسی پڑھنے سے ملتا۔ کیونکہ اسے قران کا سب بلند حصہ کہا گیا ہے۔
سورہ اخلاص کی فضیلت پہ علماء نے مستقل کتابیں لکھی ہیں۔ حافظ حسن بن محمد الخلال متوفی ٤٣٩هج کی فضائل قل ھو اللہ احد ۔
علامہ سیوطی کی فضائل القدر والاخلاص۔ یوسف بن عبد اللہ کی اربعین حدیثا فی الاخلاص۔ اور شیخ محمد بن رزق بن طرھونی کی موسوعة فضائل سور وآيات القرآن خصوصیت سے قابل ذکر ہیں۔
ان کتابوں سے احقر نے زیر نظر مضمون کی ترتیب میں بھرپور استفادہ کیا ہے۔
واللہ اعلم بالصواب
شکیل منصور القاسمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مصادر ومراجع
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

(1)۔ بخاری 5013۔موطا مالک صفحہ 142۔نسائی 171/2۔۔سنن ابی دائود 230/1۔۔سنن بیہقی 21/3۔۔شعب الایمان 376/1۔شرح السنہ 274/4۔
(2)۔۔ بخاری 59/9۔۔مسند احمد 8/3۔۔شعب الایمان 337/1۔۔
(3) ۔۔۔۔ صحیح مسلم 94/6۔ مسند احمد 429/2۔۔ جامع ترمذی 167/5۔۔ مسند اسحاق بن راہویہ 37/4۔۔
(4) ۔۔۔ مسند احمد 195/5۔ مسلم 94/6۔ شعب الایمان 377 /1۔ دارمی 460/2۔
(5)۔۔۔۔ مسند احمد 418/5۔۔ترمذی 167/5۔نسائی 171 /2۔۔شعب الایمان 378/1۔حلیہ 117/2۔۔
(6)۔۔۔۔ ابن السنی 255۔ الطبرانی 256/10۔ حلیہ 117/2۔۔168/7۔۔
(7)۔۔۔ مسند احمد 122/4۔ ابن ماجہ 1245/2۔ مسند طیالسی 86۔ تاریخ البخاری 137/طبرانی 254/17۔
(8)۔۔۔ مسند احمد 141/5۔ الیوم واللیلہ نسائی باب نمبر 27
(9)۔۔ مسند احمد 403/6۔معجم کبیر طبرانی 74/25۔اوسط 242/2۔شعب الایمان 378/1۔
(10)۔۔ سنن الدارمی 461/2۔
(11)۔۔۔۔ حلیہ ابی نعیم 304۔/1۔ معجم کبیر طبرانی405/12۔دلائل النبوہ 36/6۔۔
(12)۔۔۔ مستدرک حاکم 360/3۔۔مسند احمد 173/2۔
(13)۔۔۔ ابن ماجہ 1244/2۔ترمذی 166/5۔ العقیلی 360 /4 ۔۔
(14)۔۔۔ معجم کبیر طبرانی 112/20۔مجمع الزوائد 148/7۔۔
(15) ۔۔ شعب الایمان 378/1۔معجم صغیر 61/1۔۔
(16) ۔۔۔ مجمع الزوائد 148/7۔مسند بزار 85/3۔۔
(17) ۔۔۔ ترمذي 166/5۔۔شعب الایمان 374/1۔۔ تفسیر ثعلبی 135/13
(18)۔۔۔ فضائل قل ھو اللہ خلال 7۔
(19) ۔۔ذکر اخبار اصبہان 334/1۔۔
(20) ۔۔ العقیلی 125 /1
(21 )۔۔۔ کنزالعمال 18/4۔
(22) ۔۔۔ الدرر 413/6۔
(23)۔۔الدر 246/6
(24) ۔۔۔ موسوعہ فضائل سور487/2۔
(25) ۔۔ موسوعہ فضائل سور 487/2
(26)۔۔ موسوعہ فضائل سور 487/2۔
(27)۔۔ ایضا
(28)۔ ایضا
(29)۔۔ ایضا
(30)۔۔۔ موسوعہ فضائل سور 488/2۔
(31) ۔۔۔ ایضا
(32)۔۔ایضا
(33)۔۔ فضائل قل ھو اللہ خلال
(34)۔۔۔ مجموع فتاوی ابن تیمیہ 103/17۔
(35)۔۔۔ایضا
(36)۔۔ ایضا صفحہ 114 ۔
(37)۔۔۔ ابن تیمیہ 122/17۔
(38 )۔۔۔ فتح الملہم 193/5 اوجز المسالک 301/4۔ سندھی علی النسائی حدیث نمبر 993۔
(39)۔۔۔ فیض الباری 482/5۔ فتح الباری 246/11۔۔ عمدہ 45/20۔۔
(40)۔۔۔ فتاوی ابن تیمیہ 138/17۔۔
(41)۔۔۔ ملفوظات حکیم الامت صفحہ 98 ۔ ملفوظ نمبر 104۔۔ صفحہ 308۔۔309۔۔
(42)۔۔۔ کشف الباری ۔فضائل القرآن صفحہ 78۔79۔۔
(43)۔۔۔ احسن الفتاوی 11/9۔
(44)۔۔۔ عقود الجمان صفحہ 278۔
(45)۔۔۔ عقود الجمان 270۔
(46) ۔۔۔ ابوحنیفہ النعمان صفحہ 83۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
علامہ شکیل منصور القاسمی

https://saagartimes.blogspot.com/2018/07/blog-post_463.html





No comments:

Post a Comment