تدفین کے بعد قبر کھولنا؟

تدفین کے بعد قبر کھولنا ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال
۔۔۔۔۔۔۔۔
ایک شادی شدہ لڑکی کی موت دس ماہ قبل ہوئی تھی...اور اسکے بعد وقتاً فوقتاً مرحومہ کی والدہ کے خواب میں وہ لڑکی آتی رہتی ہے...اور اِدھر ہفتہ دن سے مسلسل وہ خواب میں آ رہی ہی اور ماں کو کہہ رہی ہے کہ مجھے قبر سے نکلواؤ میں مری نہیں ہوں....اب اس کی ماں پریشان ہے کہ وہ کیا کرے ؟
ایم ، مونگیری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
الجواب وباللہ التوفیق
مومن مردہ کی عزت واحترام بعد مرگ بھی اسی طرح ہے جس طرح حیات میں۔
حتی کہ کافروں کے مردہ جسم کے ساتھ زیادتی کرنے سے  بھی ہماری شریعت میں منع کیا گیا ہے۔
مردہ کو قبر میں دفن کردینے کے بعد سوائے انسانی حقوق (مثلا کسی کا قیمتی مال دفن کے وقت قبر میں چھوٹ جائے۔یا دوسرے کی زمین میں بلا اجازت دفن کردیا جائے تو قبر کھول کر مردہ کو چھوئے اور کفن کھولے بغیر سامان لے لینے اور ثانی الذکر صورت میں مکمل احتیاط سے نقل مکانی کی حنفیہ میں اجازت ہے) کے کسی اور وجہ سے قبر کھولنا جائز نہیں ہے۔
مسلمان کو اللہ پر بھروسہ رکھنا چاہئے۔شیطانی وساوس یا کاہنوں، نجومیوں اور خوابوں کی وجہ سے قبر کشائی کی اجازت نہیں ہے۔ اس طرح کے خوابوں کا کوئی اعتبار نہیں۔
حدیث رسول میں بعد مرگ بھی مردہ کے جسم سے چھیڑ چھاڑ کرنے سے منع کیا گیا ہے۔
ابو دائود شریف میں ہے
حَدَّثَنَا الْقَعْنَبِيُّ حَدَّثَنَا عَبْدُ الْعَزِيزِ بْنُ مُحَمَّدٍ عَنْ سَعْدٍ يَعْنِي ابْنَ [ص: 213] سَعِيدٍ عَنْ عَمْرَةَ بِنْتِ عَبْدِ الرَّحْمَنِ عَنْ عَائِشَةَ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ كَسْرُ عَظْمِ الْمَيِّتِ كَكَسْرِهِ حَيًّا سنن أبي داؤد.رقم 3207
خواب کوئی دلیل شرعی نہیں کہ اس کی وجہ سے نبوی ممانعت ختم ہوجائے ۔
مردہ کے لئے دعائے مغفرت کی جائے اور ایصال ثواب کا اہتمام کیا جائے۔
واللہ اعلم بالصواب
شکیل منصور القاسمی
بیگوسرائے
١٩\٦\١٤٣٩ہجری