گھریلو علاج

٭ اگر ہاتھ یا پیر جل جائے تو فوراً پانی میں نمک گھول کر لگانے سے چھالانہیں پڑے گا۔

٭ اگر کسی قسم کا ساگ رکھنا ہو تو فریج میں پہلے تولیہ بچھا دیں پھر اس کے اوپر ساگ وغیرہ رکھئے، ساگ خراب نہیں ہوگا۔

٭ ملٹھی کھانسی کیلئے بہترین ہے۔ ذرا سی ملٹھی کھانے سے کھانسی کافی حدتک کم ہوجاتی ہے۔ لیکن ملٹھی زیادہ کھانے سے فشار خون زیادہ ہو تاہے۔
٭ چمڑے کا جوتا بدنما ہو جائے تو اس پر تارپین کا تیل ملنے سے جوتے کا رنگ بدنما نظرنہیں آئے گا بلکہ رنگ دوبارہ نکھر آئے گا۔

٭ اگر اچار خراب ہونے لگے تو اس میں لیموں کا عرق یا سر کہ شامل کرنے سے اچار خراب نہیں ہوتا۔

٭ اگر آپ اونی کپڑوں پر پھٹکری پیس کر چھڑک دیں تو کپڑے برساتی ہوا اور کیڑوں سے محفوظ رہیں گے۔

٭اگر کپڑے پر سیاہی کا دھبہ لگ جائے تو اس پر موم لگا کر دھوئیں۔

٭ پیٹ کے درد میں کریلوں کا پانی پینے سے آرام آجا تاہے۔

٭ اگر پانی میں نمک ملا کر فرش دھویا جائے تو مکھیاں اور کیڑوں کا خاتمہ ہو جاتاہے۔

٭سردیوں میں چائے بناتے وقت ذراسی دارچینی ڈالنے سے چائے خوشبو دار ہوگی اور گلے کیلئے بھی بہتر رہے گی۔

ملٹھی کھانسی کیلئے بہترین ہے۔ ذرا سی ملٹھی کھانے سے کھانسی دور ہوجاتی ہے .

آنکھ پر چوٹ لگنے سے درد ہو تو ہلدی اور پھٹکری دو دو ماشہ کی مقدار میں لیں اور دو تولے آٹے کے حلوے میں ملا کر اس سے سکائی کریں ہلکا گرم چوٹ پر باندھ دیں اس سے آنکھ کی چوٹ صحیح ہو جاتی ہے ۔

پسی ہوئی سیپ ١ چھوٹا چمچہ
لیموں کا رس ١!٤ چھوٹا چمچہ
گلاب کا عرق ایک چھوٹا چمچہ
ہلدی ایک چوتھائی چھوٹا چمچہ
پلیٹ میں سب کو ملالیں اس آمیزے کو چہرے پر رات کو لگائیں تو بہت بہتر ہے ورنہ دن میں دو بار لگا کر دس منٹ بعد منہ دھو لیں چہرے کے داغ دھبے دور ہو جائیں گے اور رنگت صاف ہو جائے گی ۔

پیاز کا رس بالوں میں ملنے سے جوئیں ختم ہو جاتی ہیں ۔

نیم کے پتے پیس کر چہرے پر لگانے سے چہرے کے دانے ختم ہو جاتے ہیں ۔

جھائیاں جگر کی گرمی کی وجہ سے بھی پڑ جاتی ہیں ۔ جگر کی گرمی دور کرنے کیلئے  دس ، گیارہ دانے عناب لے لیں اور رات کو کسی مٹی کے پیالے میں بھگو دیں ۔ صبح نہار منہ ان دانوں کو مسل کر موٹی ململ کے کپڑے سے چھان کر شکر ملا کر پی لیں ۔ اکیس بائیس دن بعد نتائج سامنے آنا شروع ہو جائیں گے ۔ اس کے ساتھ ساتھ زیادہ چکنائی اور گرم تاثیر کی چیزوں بالخصوص گڑ ، تیل ، بینگن ، مسور کی دال وغیرہ سے پرہیز کریں ۔

آدھے لیموں کا رس ، ہلدی آدھا چائے کا چمچہ ، بیسن دو کھانے کے چمچ ملا کر پیسٹ بنا لیں اور اس کا ماسک چہرے پر لگائیں ۔ جھائیاں دور ہو جائیں گی ۔

سفید تل لیجئے اور بھینس کے دودھ میں ڈال کر پیس لیں اور رات سوتے وقت چہرے پر ملیں ۔ صبح اٹھ کر کسی اچھے صابن سے منہ دھو لیں ۔ جھائیاں دور ہو جائیں گی ۔ دن میں بھی چہرے کی صفائی کا خاص خیال رکھیں ۔

کالی رنگت کو گورا کرنے کیلئے  چرونجی کی مناسب مقدار دودھ میں ملا کر پیس لیں ۔ پھر چولھے پر ہلکا گرم کرکے کسی بوتل میں ڈال دیں ۔ ہر رات سونے سے پہلے صابن سے منہ دھو کر اس مرکب کی مالش کریں ۔ کالی رنگت گوری ہو جائے گی ۔

صبح سویرے آدھی پیالی کچے دودھ میں بیسن یا ابٹن ڈال کر گاڑھا پیسٹ بنا لیں ۔اور چہرے پر لیپ کریں ۔ دو منٹ کے بعد انگلیوں کی پوروں سے نیچے سے اوپر کی جانب آہستہ آہست ملیں ۔ یہاں تک کہ چہرہ صاف ہو جائے ۔ پھر چہرے کو ٹھنڈے پانی سے دھو لیں ۔

جن لوگوں کے بال وقت سے پہلے سفید ہو جائیں وہ روزانہ رات کو نیم گرم دودھ میں چند قطرے روغن بادام ڈال کر پئیں۔۔بال سفید ہونا رک جائیں گے .

بلند فشارِ خون اور کولسٹرول کے لئے ۔
نہار منہ دو لہسن کے جوئے پانی کے ساتھ کھائیں
سونف،اجوائن،ہریڑاں۔
قہوہ میں لیموں نچوڑ کر پینے سے تھکاوٹ دور ہو جاتی ہے.
رات کو پرسکون نیند نہ آنے کی صورت میں ایک آزمودہ نسخہ استعمال کریں
خالص سرسوں کا تیل لے کر رات کو سوتے وقت پاؤں کے تلوں پر چار پانچ منٹ تک ملیں اس سے دماغ کو تراوٹ وسکون ملے گا‘ نظر بڑھے گی اور سکون سے نیند آئے گی۔ یادداشت تیز کرنے کیلئے اس سے بہتر اور آسان نسخہ اور کوئی نہیں ہے۔
معدے کی جملہ تکالیف کیلئے 
جو کادلیہ پانی میں ڈال کر بھگودیں ایک گھنٹہ بعد گلنے تک پکائیں. پھر اس میں دودھ اور شہد ڈال کر کھائیں. اس کو روزانہ ناشتے میں کھانا ھے تین ماہ تک.
لیکوریا کیلےٴ (For Leukorrhea) پھٹکری 5 گرام ، سونٹھ 3 گرام کو خوب باریک کرکے سفوف تیار کریں
روزانہ 1 گرام صبح شام کھانے کے بعد پانی سے استعمال کریں۔

دشواری پیش آنے یا مخصوص حالات میں اطبا سے رجوع کریں.

کیسے ختم ہو مخفف کا رواج ؟

ایس اے ساگر

بعض لوگوں نے مصروفیت یا عدم فرصت  کی آڑ میں بہت سے مخفف وضع کرلئے ہیں. دفتری خط وکتابت میں اگر Thanks کی بجائے Thanx  لکھ دیا جائے تو قطعی قابل قبول نہیں ہوگا لیکن دین میں بلا تکلف اختصار سے کام لیا جارہا ہے جبکہ اہل علم نے اس کی اجازت نہیں دی ہے.

کیسا ہے ص یا صلعم وغیرہ لکھنا؟

سوال… کیا فرماتے ہیں علمائے کرام اس مسئلہ کے بارے میں کہ جب انبیائے کرام علیہم السلام کے نام لکھے جاتے ہیں، تو بطور دعا صلی الله علیہ وسلم کو مختصر کرکے ص لکھنا، علیہ السلام کو مختصر کرکے ع لکھنا یا صلعم لکھنا، اسی طرح صحابہ کرام رضوان اللہ علیہم اجمعین کیلئے مختصرا  رض لکھنا اور بزرگان دین کیلئے مختصراً رح لکھنا کیسا ہے؟ کیا ان سے درود کا مقصد ادا ہو جائے گا یا نہیں؟ اور کوئی کراہیت ہے یا نہیں؟ اور یہ کہ انبیائے کرام علیہم السلام کے علاوہ بعض اشخاص کیساتھ علیہم السلام لکھا جاتا ہے، جیسے حضرت مریم کا نام ذکر کیا جاتا ہے تو ساتھ علیھا السلام لکھتے ہیں ، تو اس کا کیا حکم ہے؟

جواب… انبیائے کرام علیہم الصلوٰة والسلام کے نام نامی اسم گرامی کے بعد علیہ الصلوٰة والسلام یا صلی الله علیہ وسلم لکھنے کی بجائے ع  یا ص یا صلعم لکھنا، اور حضرات صحابہٴ کرام رضوان اللہ علیہم السلام  کے اسمائے گرامی کیساتھ رضی الله عنہ کی بجائے رض اور بزرگانِ دین کے اسماء کیساتھ رحمہ اللہ  کی بجائے رح لکھنا اسی طرح تعالیٰ اور جل جلالہ کی بجائے  تعہ اور ج لکھنا درست نہیں، اور خلافِ ادب ہونے کیساتھ ساتھ قلتِ محبت پر دال ہے، او رمقصود جو کہ صلوٰة وسلام کہنا ہے ان حروف سے حاصل نہیں ہوتا، بلکہ علیہ الصلوٰة وسلام اور صلی الله علیہ وسلم وغیرہ پورا کرکے لکھنا چاہئے۔
اور اگر دیکھا جائے تو تمام کتب حدیث میں محدثین رحمہم اللہ تعالیٰ نے جہاں بھی نام مبارکہ ذکر کیا ہے وہاں پر پورا پورا درود وسلام لکھا ہے، تو گویا کہ اس کو ایک طرح کی اجماعی حیثیت حاصل ہے، لہٰذا پورا پورا علیہ الصلوٰة والسلام لکھنا چاہئے، اور یہ بھی ملاحظہ ہو کہ بعض ائمہ کرام رحمہم اللہ تعالیٰ اس کے قائل ہیں کہ جب اسم گرامی مکرر ذکر ہو تو ہر ہر مرتبہ تکرار کیساتھ درود پڑھنا واجب ہے، اگرچہ ایک مجلس میں ہو، تو یہ بھی صلوٰة وسلام کی اہمیت کی دلیل ہے، لہٰذا صلوة و سلام پورا لکھنا چاہئے، تاکہ مقصود اچھے طریقے سے حاصل ہو ۔
صلوة وسلام انبیائے کرام علیہم الصلوٰة والسلام کیساتھ خاص ہے، لہٰذا دیگر بزرگ اشخاص کیساتھ منفرداً صلوة وسلام پڑھنا یا لکھنا مکروہ ہے، لیکن اگر تبعاً ان پر درود لکھا یا پڑھا جائے تو جائز ہے، اس طرح کہ ان اشخاص کا نام انبیائے کرام علیہم الصلوٰة والسلام کیساتھ مذکور ہو اور صلوة وسلام میں ان کو بھی شامل کیا جائے۔ جیسے 
اللہم صل علی محمد وعلی آل محمد وصحبہ وسلم

دارالافتاء جامعہ فاروقیہ کراچی

غصہ کے جواب میں بردباری

ایس اے ساگر

دنیاوی زندگی میں اگر کوئی شخص غصہ کے جواب میں مشتعل ہونے کی بجائے تحمل اور بردباری  سے کام لے تو نہ صرف بہت سے نقصانات سے بچا جاسکتا ہے بلکہ بیشمار فتوحات بھی نصیب ہوسکتی ہیں. حکما نے غصہ کو نفس کا غلبہ قرار دیا ہے جسے قلب سے ہی زیر کیا جاسکتا ہے. یعنی جب کوئی آپ سے اشتعال انگیزی کرے تو اس کے جواب میں کمال برداشت کا مظاہرہ کیا جائے. اس سلسلے میں سعودی عرب کے شگفتہ مزاج خطیب سلیمان الجبیلان صاحب کا خوبصورت واقعہ قابل غور ہے ، کہتے ہیں کہ ایک بار میں اپنی کار میں دو  دیگر علماء کرام کیساتھ کہیں سفر میں تھا، ایک مقام پر ایک بوڑھا ساربان سڑک کنارے  اپنی جیپ میں بیٹھا  اپنے اونٹوں کو  سڑک کی دوسری طرف ہانک کر بھیج رہا  تھا۔ لامحالہ مجھے بریک لگا کر رکنا پڑا۔ اور تو سب کچھ ٹھیک رہا مگر ایک  بھاری بھرکم اونٹ خراماں خراماں چلتے چلتے سڑک کے بیچوں بیچ آ کر مزید سست رفتار ہو  گیا۔

میں نے محض اس وجہ سے کہ،  بس اونٹ بدکے بنا چلتا رہے، ہلکا سا ہارن بیب بیب ،بیب بیب کر کے دوبار بجا دیا۔ یہ کوئی اتنی معیوب حرکت بھی نہیں تھی مگر نجانے اس پر بوڑھا ساربان نہ جانے کیوں اتنا تَپ گیا کہ مجھے گالیاں دینا شروع کر دیں:
لعنت تیرے باپ پر، تو ہوتا ہے کون ہے میرے اونٹ پر ہارن بجانے والا، لعنت تجھے پیدا کرنے والی پر،
اور نجانے اس نے میرے خاندان کےکس کس  فرد کو ملعون ٹھہرایا، شاید سب پر ایک ایک کرکے لعنت بھیج ڈالی۔

ہارن کے بدلے میں گالیاں :

بڑے ادب کیساتھ بجائے ہوئے ہلکے سے  اس ہارن کے بدلے میں اتنی گالیاں بالکل نہیں بنتی تھیں، بلکہ جس ردھم کے ساتھ میں نے ہارن بجایا تھا اس کا تو شاید مطلب بھی یہی بنتا تھا کہ اونٹ جی چلتے رہو، اونٹ جی چلتے رہو۔   اور اس کا یہ بدلہ ملا تھا۔ میں نے انتہائی خوفناک تیور بنا کر  زور سے کار کا دروازہ کھولا اور باہر نکل کر پوری قوت کیساتھ  دھڑام سے بند کرکیا۔ میرے ساتھی علماء کرام میں شیخ صالح صاحب نے گھبراتے ہوئے پوچھا؛
کیا پریشانی پیدا کرنے جا رہےہو؟
میں نے کہا؛ گھبرائیے نہیں، آپ کو کچھ نیا کر کے دکھاتا ہوں۔

خلاف توقع عمل :

میں بڑے بڑے قدم اٹھاتے ہوئے، اپنی قمیض کے بازو اوپر کو چڑھاتے لپیٹتے ہوئے  جیپ کی طرف گیا۔ بوڑھا بدو میرے تیور دیکھ کر بہت زیادہ گھبرا چکا تھا اور اس کی حالت پوری طرح  ڈانواں ڈول ہوتی دکھاتے دے رہی تھی۔  میں نے جھٹکے سے اس کی جیپ کا دروازہ کھولا اور اور اُس کے  سر پر بوسہ دیتے ہوئے کہا؛ بزرگو، مجھے معافی دیدو، مجھے لگتا ہے کہ میں نے آپ کے اونٹ کیساتھ بے ادبی کرکے اسے ناراض کیا ہے جس کا مطلب یہ ہے کہ میں نے آپ کے اونٹ کیساتھ ساتھ آپ کو بھی ناراض کیا ہے۔ اللہ آپ کو بہت جزائے خیر عطا کرے، مجھے معاف کر دیجئے۔

گلے شکوے ہوئے دور :

بوڑھے کیلئے یہ ایک نیا جھٹکا تھا،  شرمساری اور خجالت کے مارے برا حال، اپنے حواس پر قابو پاتے ہوئے کہا؛ میں نے تجھ پر، تیرے ماں باپ پر اور تیرے سارے خاندان پر لعنت بھیجی ہے اور تو الٹا  میرے سر پر بوسہ دے رہا ہے اور مجھ سے معافی مانگ رہا ہے۔  مجھے نہیں، تجھے ناراضی ہوئی ہے، مہربانی کر، مجھے معاف کر دے۔

میں نے کہا؛ اللہ کی قسم، میں تو تجھے قیامت  تک معاف نہیں کرونگا،  تو نے مجھے اور میرے خاندان کو جتنی گالیاں دیں ہیں، اُن   سب کی معافی کا تو  بس اب ایک ہی طریقہ بچا ہے  کہ  اگر تو میری ایک شرط مان لے تو؟

بوڑھے نے کہا؛ میں حاضر ہوں، بتا تیری کیا شرط ہے؟ مین نے کہا؛ میری یہ شرط ہے کہ تو ہم سب کو اپنی اونٹنیوں کا دودھ پلا۔  بوڑھے نے کہا؛ بخدا یہ تو کوئی بڑی شرط نہیں ہے، میں بالکل حاضر ہوں۔ اور جلدی سے جیپ سے اُتر کر نیچے زمین پر قالین بچھایا، گدے نکال کر لگائے، میں نے اپنے ساتھیوں سے نیچے آنے کو کہا، اور ہم سب بیٹھ گئے۔  بوڑھے نے جیپ کا ہارن بجا کر دور کھڑے اپنے  خادم کو  بلا کر  ذمے لگایا کہ جلدی سے اونٹنیوں کا دودھ نکال کر لائے اور ہم سب کو پلائے۔

میرے پوچھنے پر کہ تجھے شعر کہنا آتے ہیں تو اس نے ہمیں بدوی ادب کے ڈھیروں شعر سنا  ڈالے۔ یہ محفل آدھا گھنٹہ جمی اور ایسا ماحول بنا کہ جیسے ہم برسوں کے واقفکار ہوں۔ یقینی بات ہے باتوں باتوں میں بوڑھا بھی جان چکا تھا کہ ہم کون لوگ ہیں۔ آدھے گھنٹے کے بعد جب ہم  نے اجازت لیکر اٹھنا چاہا تو بوڑھے نے ہم تینوں کی قمیضیں پکڑ لیں، کہنے لگا؛ اللہ گواہ ہے مجھے تم لوگوں سے پیار ہو گیا ہے۔ میں تم لوگوں کو ایسے نہیں جانے دونگا۔

میں نے بوڑھے سے کہا؛ ہمیں پہلے بھی بہت دیر ہو چکی ہے، کھانا وغیرہ بشرط زندگی پھر کسی وقت پر اٹھا رکھتے ہیں، تو بس ہمیں اجازت دیدے۔ بوڑھے نے اپنے اونٹوں کے پیچھے بہت دور (اونٹ ڈیڑھ سو سے زیادہ تھے)  گہرے پردے میں ڈھپی چھپی تین لڑکیوں کی طرف اشارہ کرتے ہوئے کہا؛ وہ دیکھو؛ وہ میری  تین بیٹیاں ہیں، تم تینوں عالم فاضل لوگ ہو، مجھے عزت بخشو اور  ایک ایک سے نکاح کر لو۔

نیکی اور بدی میں تفریق :

حاضرین کرام، کیا خیال ہے پھر،  گالیوں کے  بدلے میں ایک نہیں تین تین رشتے۔  یہ اس لئے ہے کہ "نیکی اور بدی برابر نہیں ہوتی۔ برائی کو بھلائی سے دفع کرو پھر وہی جس کے اور تمہارے درمیان دشمنی ہے ایسا ہو جائے گا جیسے دلی دوست
(سورة فصلت-34)"

اس سارے قصے کا ایک اور  خاتمہ بھی ہو  سکتا تھا کہ جب بوڑھے نے مجھے گالیاں دی تھیں، میں بھی باہر نکل کر اُسے للکارتے ہوئے کہتا؛  ارے او بڈھے شیطان، تو میرے ماں باپ پر لعنت بھیجتا ہے؟ اور بوڑھے نے اپنی جیپ کی نشست کے نیچے جو کلاشنکوف رکھی ہوئی تھی نکال کر مجھے  ایک برسٹ  مارتا اور اس فتنے کا ایسا سیاہ خاتمہ ہو جاتا۔

برصغیر میں رائج مصاحف کے رسم کا شرعی جائزہ

ایس اے ساگر

دور حاضر میں نت نئے فتنے سر ابھار رہے ہیں. غنیمت ہے کہ ایسے احباب کی کمی نہیں ہے جو ان کا سد باب کرسکتے ہیں.  ڈاکٹر مولانا قاری ضیاء الحق صاحب   نے مصاحف کے رسم کا شرعی جائزہ لیکر امت کی رہبری فرمائی ہے.
 
'مخصوص ذہنیت' کے حاملین

دراصل برصغیر ہند، پاک میں قرآن کریم کے جو نسخے شائع  ہوتے ہیں وہ امام ابوعمر الدانی کے علمی منہج کے مطابق ہیں  اور ان پر تمام مسالک کے علماء کا اعتماد واتفاق چلا آرہا ہے مگر کچھ عرصہ  سے ایک مخصوص ذہنیت کے حامل  افراد نے یہ کوشش شروع کررکھی ہے کہ ان معروف ومانوس اورمسلم الثبوت نسخوں کی طباعت روک کر ایک اور نسخے کی طباعت قانون کی رو سے ضرور قرار دی جائے جسے یہ لوگ مثالی نسخہ کے نام سے موسوم کرتے ہیں ۔اس فتنے کی بو محسوس ہونے پر ماہر ومحقق علماء نے اس کیخلاف  قلم اٹھایا  جس کے نتیجہ میں بلند پایہ اور تحقیقی مضامین منظر عام آئے۔زیر نظر تحقیقی مقالہ بھی اس سلسلے کی ایک کڑی ہے جس میں ماہر  ومشاق قاری ،محقق عالم دین  ڈاکٹر مولانا قاری ضیاء الحق صاحب  مدظلہ  العالی نے تفصیل کیساتھ برصغیر میں رائج مصاحف قرآنیہ کے رسم الخظ کا تحقیقی وتاریخی تجزیہ پیش کیا ہے   اور سنجیدہ اور ٹھوس دلائل کیساتھ ان شکوک وشبہات اور غلط فہمیوں کا ازالہ کیا ہے جو برصغیر  میں چھپنے والے مصاحف کے رسم وضبط کے متعلق لوگ پھیلاتے ہیں۔اس سے پہلے اسی موضوع پر ڈاکٹر محمد شفاعت  ربانی کا ایک مضمون بھی ماہنا مہ وفاق المدارس کے رجب 1436ھ کے شمارہ 2 میں شائع ہوچکا ہے۔حال ہی میں  یہ مسئلہ اپنی نزاکت واہمیت اور ہمہ گیر اثرات کی  وجہ سے اسلامی نظریاتی کونسل پاکستان میں بھی زیر بحث آیا تھا اور کونسل کے اراکین نے علمی مباحثہ ومناقشہ کے بعد اپنی فیصلے  میں قرار دیا تھا کہ 'فیصلہ۔الف :پاکستان میں چھپنے والے مصاحف قرآنیہ رسم عثمانی کے موافق ہیں  اور صحیح ہیں ،مثالی نسخہ کے نام سے کوئی قرآن کریم نہ چھاپا  جائے۔' اس مختصر تمہید کے بعد اب آپ اصل مضمون ملاحظہ  فرمائیے                                                                             
تاریخی پس منظر :

بسم اللہ الرحمٰن الرحیم، الحمد للہ الذی انزل علی عبدہ الکتب ولم یجعل لہ عوجا،والصلوۃ والسلام علی المبعوث رحمۃ للعٰلمین وعلی آلہ وصحابتہ أجمعین،وعلی من تبعھم باحسان الی یوم الدین أما بعد، علماء محققین وماہرین نے قرآن کریم کی قراءت  صحیحہ و غیر صحیحہ کے درمیان فرق اور امتیاز کیلئے جو بنیادی اصول وارکان ثلٰثہ مقرر کردئیے   ہیں ان میں سے ایک بنیادی رکن مصاحف عثمانی میں سے کسی ایک مصحف کے رسم کیساتھ موافقت بھی ہے ، اب یہ موافقت ظاہرا ہو یااحتما لا یا تقدیرا ۔

خط اور رسم الخط :

سیدنا حضرت عثمان غنی رضی اللہ عنہ (شہادت ۳۲ھ ) نے جو پانچ (یا سات اور ایک قول پر آٹھ ) مصاحف لکھوائے تھے اُن میں سے کسی ایک مصحف میں  وہ قراءت لکھی ہوئی ہو، چاہے سارے مصاحف میں نہ بھی ہو  ۔(دوسرے دوارکان یہ ہیں ۱،نحوی وجوہ میں سے کسی ایک وجہ کے موافق ہو ۔۲ ،صحیح اور متصل سند سے ثابت ہو ) یہاں اصل موضوع کی طرف بڑھنے سے پہلے یہ جاننا بے حد ضروری ہے کہ صرف خط اور رسم الخط میں بہت فرق ہے  خط کے معنی تو یہ ہیں کسی کلمے کو اس کے ان حروف ہجاء سے لکھنا جو اس پر وقف اور ابتداءکے وقت پائے جاتے ہیں ۔ جبکہ رسم الخط کے معنی ہوں  گے"قرآنی کلمات کو  حذف وزیادت اور وصل وقطع کی پابندی کے ساتھ اس شکل پر لکھنا جس پر صحابہ کرام  رضوان اللہ علیہم اجمعین کا اجماع ہے اور وہ پیغمبر صلی اللہ علیہ وسلم سے بتواتر منقول ہے۔خط اور رسم الخط کے فرق کو ذہن نشین کرنے کے لئے ذیل میں دی گئی مثالوں پر غور کریں  تو آسانی ہوگی ۔( ۱)العٰلمینَ (۲)الرحمٰن (۳) الصٰلحٰت (۴) ہٰؤلآء (۵) من نبایٔ المرسلین  ۔مذکورہ کلمات کا موجودہ خط رسم عثمانی کے موافق ہے ،کیونکہ ان میں  الف  محذ وف الرسم ہے ،لکھا ہو ا نہیں ہے، لہٰذا اس میں خط اور رسم الخط دونوں موجود ہیں ۔ لیکن اگر ان ہی کلمات  کو درجہ ذیل طریقہ پر لکھیں  ۔ (۱)اَلعالمین (۲) الرحمان(۳) الصالحات (۴) ھآأُلاء (۵) من نباءِ المرسلین ۔

رسم عثمانی کی مخالفت :

اب ان میں خط (کتابت) تلفظ کے موافق ہے، مگر رسم عثمانی کے بالکل خلاف ہے ، کیونکہ ان میں الف مرسوم (لکھا ہوا ) ہے ،لہٰذا یہاں خط تو ہے مگر رسم الخط نہیں ہے۔ اس مختصر تمہید کے بعد اب یہ جاننا ضروری ہے کہ قرآن مجید کا یہ رسم الخط توقیفی وسماعی ہے یعنی پیغمبر صلی اللہ علیہ وسلم سے مسموع اور آپ صلی اللہ علیہ وسلم  ہی کے اَمرو املاء سے  ثابت  و منقول  ہے اور لوح محفوظ کی ہیٔت کتابت اور رسم الخط کے مطابق منزّل من اللہ ہے جس میں رائے اور قیاس کا ذرا بھی دخل نہیں ہے ۔(خطان لایقاسان خط القوافی و  خط القرآن ) لہٰذا اس کی اتباع اور موافقت بہرصورت واجب ہے اور مخالفت حرام  ہے ،محققین علماء کا یہی فیصلہ ہے ، چنانچہ علامہ برہان الدین ابو اسحٰق ابراہیم بن عمر الجعبری (۷۳۲ھ) لکھتے ہیں  ۔ رسم المصحف توقیفاً ہو مذہب الأربعۃ۔ (شرح العقیلۃ )۔

  کتب تواریخ وتراجم :

کتب تواریخ وتراجم بتاتی ہیں کہ رسالت مآب صلی اللہ علیہ وسلم  کے دور سعادت میں وہ صحابہ کرام رضوان اللہ علیہم اجمعین جو معروف بالکتابت تھے اُن کی کل تعداد چھپن  تھی ، ان کو عموماً پانچ قسموں میں تقسیم کیا گیا ہے ۔

(۱) وہ حضرات صحابہ کرام رضوان علیہم اجمعین ؓجن سے آ نحضرت  رسول مقبول صلی اللہ علیہ وسلم  قرآنی آیات اور خطوط نویسی  کا کا م لیتے تھے ایسے حضرات چونتیس شمار کئے گئے ہیں ان کو کاتبین نبی صلی اللہ علیہ وسلم کہا  جاتاہے ۔

(۲) کاتبین جامعین ، یعنی وہ حضرات صحابہ کرام رضوان علیہم اجمعین جو بذات خود قرآن کریم کو بذریعہ تحریر وکتابت جمع فرماتے تھے، یہ چھ ہیں ۔

(۳) کاتبین مصاحف ، وہ حضرات صحابہ کرام رضوان اللہ علیہم اجمعین جو مصاحف عثمانی کی کتابت میں شریک رہے، یہ تین ہیں۔

(۴) کاتبین حدیث ، وہ حضرات صحابہ جو وحی خفی یعنی احادیث نبوی صلی اللہ علیہ وسلم کے تحریر کرنے اور کتابت کرنے کا خاص اہتمام فر ماتے تھے ، ان کی تعداد سات ہے  ۔

(۵) کاتبین محض، وہ حضرات جو طرز اور تحریر کے اسلوب سے بخوبی آگاہ تھے ان کی تعداد چھ  ہے ۔ اس طرح گویا تمام حضرات کاتبین  صحابہ ؓ کی کل تعداد چھپن ہے ۔

عربوں کا حیرت انگیز حافظہ :

زمانہ اسلام سے بہت پہلے عرب میں علم الانساب اور شعر وشاعری کا بہت چرچا تھا جو قدیم زمانے سے چلا آرہا تھا مگر یہ سب محض زبانی وکلامی تھا ، چونکہ عرب قوم کے حافظے بھی عموما حیرت انگیز طور پر قوی ہوتے تھے ، لہٰذا اسی پر سب کا دارومدار تھا ،تحریر کا رواج نہیں تھا نہ حرف شناسی تھی۔

چنانچہ سب سے پہلے قبیلہ بنی طلحہ کے تین افراد مرامر بن مرّہ ، اسلم بن سدرہ ، اور عامر بن جدرہ نے کتابت نسخ کی بنیاد ڈالی انہوں نے قدرتی ذکاوت کی بنیاد پر یکجا ہو کر حروف کی شکل اور وضع قراردی اور حروف تہجی کو سریانی زبان کی ترتیب پر مرتب کیا ۔ جب یہ اس کام سے فارغ ہو چکے اور حروف کے نقوش اور ان کی صورتوں کی باہمی ترتیب پر قدرت حاصل ہوگئی تو پھر حیرہ کے باشندگان نے باضابطہ اس فن کو ان سے سیکھا ، انہی حیرہ والوں کا ایک شاگرد بشیر بن ولید  (جو دو مۃ الجندل کا رئیس تھا ) زیا رت کعبہ یا کسی اور غرض سے مکہ مکرمہ آیا تو وہاں ابوسفیان کی بہن صہبابنت حرب سے نکاح کرلیا ، پھر ابوسفیان بن حرب (والد ِامیر معاویہ رضی اللہ عنہ ) سے ملا ، انہو ں نے بشیر سے فن کتابت سیکھنے کی درخواست کی  ، چنانچہ ابوسفیان اور ابوقیس بن عبد مناف یہ دو شخص مکہ میں  بشیر کے شاگرد بنے ،بعد ازیں انہوں نے اہل طائف کو تحریر سکھائی ،اور قریش کے دیگر قبائل بھی رفتہ رفتہ اس فن کو سیکھتے گئے اس طرح فن کتابت کا عرب اور حجاز کے اکثر قبائل میں رواج ہوگیا ۔

مدینہ منورہ میں تحریر وکتابت :

مدینہ منورہ میں  قبل از اسلام تحریر وکتابت رائج ومتعارف ہونا شروع ہو گئی تھی ، انصار اپنے قصائد واشعار بذریعہ کتابت قلم بند کرنے  لگے تھے ۔ خط عربی (حمیری) نے تبابعہ کے دور میں ترقی پائی ، پھر ان کے ختم ہونے کے بعد آل منذر یعنی سلاطین حیرہ کے ہاں فن کتابت کا رواج ہوا، کیونکہ  یہ تبابعہ کے قرابت دار تھے پھر حیرہ کی شاگردی قریش اور اہل طائف نے اختیا ر کی ۔ جب سلطنت عرب کا دامن وسیع ہونے لگا اور بصرہ وکو فہ کو دارالخلافہ ہونے کا شرف حاصل ہوا تو اب ظاہر ہے کہ والیان حکومت وارکان سلطنت کو فن کتابت کی ضرورت بھی محسوس ہوئی اور ارکان  دولت کی سرپرستی کی بدولت اس میں مزید چارچاند لگ گئے اور بڑی حد تک اس میں اصلاحات ہوئیں چنانچہ خط کوفی آج تک مشہور چلا آرہاہے ۔

معروف  بغدادی رسم الخط :

عرب کی حدود سلطنت بڑھتے بڑھتے جب افریقہ اور اندلس تک جاپہنچیں اور وہاں اسلام کا جھنڈا لہرایا اور بنو عباس نے بغداد کی داغ بیل ڈالی ،بغداد چونکہ سلطنت عرب کا مرکز اور دارالاسلام تھا اس وجہ سے فن کتابت نے یہاں  بہت نمایاں ترقی کی ،غالباً اسی وجہ سے بغدادی رسم الخط بہت معروف رہا حتی کہ افریقہ میں اسی کو اختیار کیا گیا ، البتہ اندلس میں بنو امیہ نے اپنے خط کو دیگر صنائع کی طرح بہت ہی ممتاز اور جدا کرلیا ۔ پھر جب سلطنت اسلامیہ تنزل اور زوال کا شکار ہوئی تو خط وکتابت ہی نہیں تمام علوم وفنون نے اپنا منہ موڑ کر رخ تبدیل کرلیا اور مصر وقاہرہ میں جاکر اس کو عروج حاصل ہوا ۔

کتابت وتدوین قرآن :

عموماً قرآن کریم کی کتابت وتدوین کونمایاں طور پر تین ادوار میں تقسیم کردیا گیا ہے  :

(۱) پہلا دور،دور نبوی صلی اللہ علیہ وسلم  :

نزول وحی کے وقت جب کوئی آیت یا آیات و سورت نازل ہوتی تھی تو آنحضرت پاک صلی اللہ علیہ وسلم اسے  حضرت زید بن ثابت رضی اللہ عنہ وغیرہ کو بلا کر لکھوادیتے تھے  ، یہ حضرات کاتبین وحی  اسے کبھی ہڈی پر کبھی کھجور کی ٹہنی یاچھال پر اور کبھی پتھروں کی ہموار تختی پر لکھ  لیا کرتے تھے ، اس طرح پورے کا پورا قرآن مجید پیغمبر صلی اللہ علیہ وسلم  کے دور مبارک ہی میں پورا ہوگیا تھا ، تاہم اُس وقت اکثر دارومدار حفظ صدری پر تھا ، عموماً صحابہ کرام ؓ بغیر دیکھے صرف سن کر خداداد قوت حافظہ کی بدو لت اپنے سینوں میں  محفوظ رکھتے تھے ۔

(۲)دوسرادور ،دور صدیقی :

  پیغمبر صلی اللہ علیہ وسلم کے وصال کے بعد سلسلہ وحی منقطع ہونے کی بناء پر درمیانی اضافہ جات کی گنجائش باقی نہ رہی ، قرآن کریم جو اب تک باضابطہ طور پر کتابی  شکل  میں مجتمع اور یکجا حالت میں نہیں تھا ،دور صدیقی میں یکجا کردیا گیا ، جس کا مختصر پس منظر یہ تھا کہ  سید نا ابوبکر ؓ کے عہد خلافت راشدہ میں یمامہ کے مقام پر حضرت خالد بن ولید ؓکی سرکردگی میں مدعی نبوت مسیلمہ کذاب سے ایک  خونریز جنگ ہوئی جس میں شہدائے اسلام کی کل تعداد بارہ سو تھی اور بہت سے مجروح تھے ،حاشیہ بخاری شریف ص۷۴۵  پر مذکور ہے کہ" کان عدۃ من القراءِسبع مائۃ " یعنی اس جنگ میں شہید ہونے والے حفاظ وقراء کی تعداد سات سو  تھی ،جبکہ ان قراءمیں حضرت  سالم ؓ بھی تھے جن کی بڑی نمایاں خصوصیت یہ تھی کہ یہ ان چار جلیل القدر قراء میں دوسرے نمبر پر تھے جن سے پیغمبر صلی اللہ علیہ وسلم قرآن مجید پڑھنے کا حکم فرما یا کرتھے (بخاری شریف   جلد ۲،   ص۷۴۸،) نیز یہ کہ حضرت سالم رضی اللہ عنہ کیساتھ جو فوجی دستہ تھا وہ خاص اہل قرآن یعنی قراء وحفاظ کا دستہ سمجھاجاتا تھا ، یہ سب حضرات ایسے تھے جن کے پاس قرآن مجید تحریری شکل میں بھی تھا ۔ سیدناحضرت  عمر فاروق رضی اللہ عنہ کو اس اندو ہناک صورتحال سے سخت اندیشہ اور فکر لاحق ہوئی جبکہ واقعے کی اہمیت کا بھی یہی تقاضا تھا ، اگر بعد میں بھی ایسے جنگوں کے واقعات رونما ہوتے جن میں قراء وحفاظ شہید ہوتے رہتے تو امت مسلمہ کے اس عظیم نعمت ولازوال دولت سے محروم ہو جانے کا قوی اندیشہ تھا ، چنانچہ آپ رضی اللہ عنہ نے سیدنا صدیق اکبر رضی اللہ عنہ کی توجہ اس جانب کروائی اور آپ رضی اللہ عنہ نے قرآن پاک کے تمام حصوں  کو یکجا طورپر جمع کرنے کی سعی بلیغ فرمائی (بخاری ج ۲ ص ۷۴۵) اس سلسلے میں حضرت صدیق اکبر رضی اللہ عنہ نے حضرت زید بن ثابت رضی اللہ عنہ کو تتبع اور جمع قرآن کا حکم فرمایا ،چنانچہ حضرت زید رضی اللہ عنہ کو لکھنے اور حضرت اُبی بن کعب رضی اللہ عنہ کو لکھوا نے کاحکم فرمایا ۔ انتہائی احتیاط کے  پیش نظر ان دونوں حضرات نے یہ طریقہ اختیار کیا کہ جن حضرات  صحابہ کرام رضوان اللہ علیہم اجمعین کے پاس سے قرآن مجید اکٹھا کر تے ان سے دو گواہ اس بات کیلئے  لیتے کہ انہوں نے یہ آیا ت مبارکہ یا قرآن کا حصہ پیغمبر صلی اللہ علیہ وسلم کے بتائے  ہوئے رسم الخط پر تحریر کیا تھا ،اس طرح انتہائی محتاط انداز میں جمع قرآن کا کام  انجام دیا گیا۔ یہ نسخہ قرآنی سیدنا ابوبکر صدیق رضی اللہ عنہ کےپاس آپ کی وفات تک موجود رہا، آپ کی وفات کے بعد امیر المؤمنین سید ناحضرت  عمر فاروق رضی اللہ عنہ کے پاس تاحیات رہا اور آپ کی شہادت  و وفات کے بعد ام المؤمنین حضرت حفصہ رضی اللہ عنہا کے پاس رہا ( النشرج۱ ص ۷) جس حسن انتظام واہتمام کیساتھ جمع وکتابت قرآن مجید کی یہ عظیم الشان  خدمت خلیفہ اول نے انجام دی اسے دیکھ کر کون  کہہ سکتا ہے کہ اس میں کسی بھی قسم کا کوئی سقم یا ادنی ٰفروگزاشت باقی رہی ہوگی ،اس مو قع پر حضرت علی رضی اللہ عنہ کا وہ مقو لہ نقل کئے بغیر آگے نہیں بڑھ سکتا جس میں انہوں نے فرمایا "اللہ تعالیٰ ابوبکر (رضی اللہ عنہ ) پر رحم فرمائے وہ اولین ہستی تھے جنہوں نے قرآن کو کتابی صورت میں جمع فرمایا "(البرہان ج ۱ ص ۲۳۹) بہر حال اس عظیم الشان ذمہ داری سے فراغت کےبعد اس کے تصدیق شدہ نسخو ں کی بکثرت نقلیں  شائع کی گئیں ۔ چنانچہ کوئی مقام کوئی شہر ایسا نہ رہا جہاں لوگوں کے پاس مصاحف کے نسخے نہ ہوں ۔

تیسرا دور ،دور ِفارو قی :

خلیفۃ المسلمین ہونے کے بعد حضرت عمر فاروق رضی اللہ عنہ قرآن کریم کی نشر واشاعت کی طرف بطور خاص متوجہ ہوئے ،چنانچہ آپ رضی اللہ عنہ نے ایک مرتبہ اپنے فوجی افسران کو خط میں لکھا کہ میرے پاس حفاظ قرآن بھیجو ،اس پر حضرت سعد بن أبی وقاص رضی اللہ عنہ نے جو اباً  لکھا کہ میری فوج میں تین سو حفاظ ہیں۔ امام ابن حزم اندلسی رحمہ اللہ علیہ کہتے ہیں کہ آپ رضی اللہ عنہ کے عہد خلافت میں امت کے پاس ایک لاکھ سے زائد قرآن پاک کے لکھے ہوئے نسخے  موجود تھے ،اسی کیساتھ باجماعت نماز تراویح کی بنیاد آپؓ نے ڈالی اور پوری مملکت میں اسے نافذ فرمایا ،حفظ قرآن کی تحریک کو آپ رضی اللہ عنہ  کے اس فرمان سے زبردست تقویت حاصل ہوئی ، امت مسلمہ پر حضرت عمر رضی اللہ عنہ کا یہ بڑا احسان ہے کہ آج اس کے پاس قرآن مجید اسی شکل میں جیسا کہ نزول کے وقت تھاسید نا  عمر فاروق رضی اللہ عنہ کی بر کت سے محفوظ طریقہ پر پہنچ گیا ۔

چوتھا دور ،دور عثمانی :

  جب فتوحات اسلامی کا دائرہ وسیع تر  ہوا ،اور جزیرۃ العرب سے باہر مختلف امصار وبلاد کے لوگ حلقہ بگوشِ اسلام ہونے لگے اورلسان  عرب کے مادری زبان نہ ہونے کے سبب اس کے حروف والفاظ کےصحیح تلفظ واداء پرقدرت ان میں عموماً نہیں پائی جاتی تھی  با ایں ہمہ خود قبائل عرب میں مختلف لب ولہجہ کا اختلاف کثرت سے موجود تھا جس کی وجہ سے ان میں مختلف طریقہ اداء   تلاوت کے وقت بھی پایا جاتا تھا ،اگر چہ فی الحقیقت یہ اختلاف خاص عرب قوم یا عربی زبان کے ساتھ مخصوص نہیں ہے۔ جیسا کہ ابن قتیبہ ان اختلافات کا ذکر کر تے ہوئے لکھتے ہیں :

"فا لُھذلی یقرأ" عتٰی عین" والاسدی یقرأ "تِعلمون"

بکسر التاء ، والتیمی یَہمزوالقریش لایھمز "(تبیا ن فی مباحث القرآن  ص ۴۴ طاہر الجزائری ) "یعنی قبیلہ ہذیل "حتی  حین" کو" عتی عین" پڑھتے ہیں ، اور اسدی لوگ "تِعلمون"  بکسر التاء پڑھتے ہیں اسی طرح تمیمی ہمزہ کو بالتحقیق پڑھتے ہیں اور قریش ہمزہ نہیں پڑھتے ہیں " ۔ اسی طرح قبیلہ قیس کے لوگ تانیث کے کاف کا تلفظ شین سے اس طرح کرتے ہیں کہ " قد جعل َِرَ بک تحتکِ سریاً" کو  "ربشِ تحتشِ سریا" پڑھتے ہیں ،تمیمی "اَن"  کو" عن" ادا کر تے ہیں ،اور یہی تمیمی سین کی جگہ ثا کا تلفظ کرتے تھے مثلا "برب الناث ، ملک الناثِ"  پڑھتے  تھے ۔

لب و لہجے اور زبان کا اختلاف :

غور فرمائیں کہ جب لب ولہجہ کے اختلاف میں قبائل عرب کا یہ حال تھا ، تو اہل عجم کا کیا پوچھنا ؟ یوں بھی لب ولہجہ اور زبان کا اختلاف آپ کو ہر دور میں ملے گا ۔ اب اگر قرآن کریم کی کتابت وطباعت مختلف انداز،تلفظ اور طرح طرح کے لب و لہجہ کے لحاظ سے ہوتی توآج ہمارا کیا حال ہوتا ،امت عظیم اختلاف وتفریق کا شکار ہو کر رہ جاتی  ، اسی کے ساتھ دوسرا مسئلہ یہ بھی درپیش تھا کہ عوام الناس معلمین سے قرآن سیکھتے پڑھتے اور دوسروں کو تعلیم دیتے رہے ،ان معلمین میں بعض تعلیم کے وقت کچھ تشریحی و توضیحی کلمات کا اضافہ بھی کرتے تھے اور متعلمین بعض مر تبہ اسے قرآن کا جز سمجھ کر محفوظ کرلیتے  تھے ،مثلا "لیس علیکم جناح ان تبتغو ا فضلا من ربکم "(تم پر کوئی گناہ نہیں کہ تم اپنے رب کا فضل تلاش کرو ) حضرت عبداللہ بن مسعود ؓ نے اپنے ذاتی نسخہ میں فی مواسمِ الحج کے الفاظ لکھے تھے ،جسکا  مطلب یہ ہےکہ ایام حج میں تجارت کرکے  کچھ مالی فائدہ اٹھایا جاسکتا ہے اب ظاہر بات ہے کہ یہ اضافہ محض توضیح  وتشریح کی غرض سے تھا ۔ اسی طرح ہر تلفظ کی ادائیگی کے لئے پیغمبر صلی اللہ علیہ وسلم  نے جو اجازت دی تھی ، اس میں بھی مبالغہ ہونے لگا اور نوبت  سخت قسم کے اختلافات" کَفّرَ بعضُہم بعضاً" تک پہنچنے لگی ۔ چنانچہ عہد عثمانی میں  فتح آرمینیہ اور آذر بائیجان ۳۰ھ کے وقت شام اور عراق کی فو جیں ایک جگہ جمع تھیں ان دونوں کی قراءت   میں تشویشناک حد تک اختلاف پایا گیا ، ہر شخص اپنی قراءت کو دوسرے سے افضل قرار دیتا ۔ اس جنگ میں دیگر   اصحاب کے ساتھ حضرت حذیفہ بن یمان رضی اللہ عنہ بھی تھے ، انہوں نے جب یہ صورتحال دیکھی تو انہیں سخت تشویش ہوئی،   پوری تفصیل بخاری شریف ص ۷۴۶میں موجود ہے ، اسی  طرح مشکوۃ باب فضائل القرآن ص۱۹۳ اور النشرج  ۱ ص ۷ میں مذکور ہے ، جبکہ امام شاطبی رحمہ اللہ علیہ  نے علامہ دانی رحمہ اللہ علیہ  (م ۴۴۴ھ ) کی کتاب المقنع کو نظم کرتے ہوئے اپنے قصیدہ رائیہ کے شعر نمبر ۳۱سے نمبر ۳۴ تک کے چار اشعار میں اس کو بیان کیا ہے ۔ خلاصہ یہ کہ حضرت حذیفہ رضی اللہ عنہ کو اس سے بڑا دکھ ہوا اور واپس ہو کر آپ نے خلیفہ وقت حضرت عثمان رضی اللہ عنہ سے یہ واقعہ بیان کرکے ان کی توجہ اس جانب مبذول کروائی کہ قراءت کو رسم الخط کا پابند اور اضافہ جات کو حذف کیا جائے اور جمع شدہ قرآن سب کے روبہ رو لایا جائے ۔حضرت عثمان رضی اللہ عنہ  نے حضرت حذیفہ رضی اللہ عنہ  کی  رائے کو پسند فرمایا  اور ام المؤمنین حضرت حفصہ رضی اللہ عنہا کے پاس سے عہد صدیقی کا جمع کردہ قرآن مجید منگواکر حضرت زید بن ثابت ، حضرت عبد الرحمٰن بن حارث بن ہشام رضی اللہ عنہما کو اس کام پر مقرر فرمایا۔(  بخاری شریف ج۲ص ۷۸۴)۔      

حضرت عثمان رضی اللہ عنہ کی تاکید :

ان حضرات کو حضرت عثمان رضی اللہ عنہ کی   طرف سے یہ تاکید کی گئی کہ اس رسم الخط میں تمام قراءات متواترہ ثابت ہوں، امام سیوطی الاتقان ج ۲ ص ۲۸۹ میں لکھتے ہیں کہ جہاں تک مشہور اور مختلف قراءٰت  کا تعلق ہے جیسے  "أوصیٰ ووصّیٰ ، تجری ، تحتھا ،اور، من تحتھا ،سیقولون اللہ ،اور، سیقولون لِللّہ ،فتبیَّنوا ، اور، فتثبّتوا ،وغیرہ یہ سب قرائتیں حضرت عثمان ؓ کے مصحف میں موجود تھیں ، اور چونکہ اس میں نقطے اور اعراب نہیں تھے جس کا لازمی نتیجہ یہ ہوا کہ بعض الفاظ کو جن میں مختلف قراءٰت تھیں انہیں کئی طریقے سےپڑھا جاسکتا تھا ۔ قراءات متواترہ کو ثابت اور باقی رکھنے کی وجہ یہ تھی کہ اس کی اجازت خود حدیث مشہور سے ثابت ہے، ارشاد فرمایا نبی کریم صلی اللہ علیہ وسلم  نے
"اِن ھذا القرآن اُنزل علی سبعۃ أحرف فاقرؤا ماتیسرمنہ "
(صحیحین ج۲ص ۷۴۷ ۔ ج ۱ص
۲۷۲۔)                                       
دوسری تاکید یہ تھی کہ دوران تلاوت جہاں اختلاف ہو اور مشکل پیش آئے وہاں لغت قریش کو ترجیح دیتے ہوئے اسی کے مطابق لکھا جائے کیونکہ قریش ہی کی لغت میں قرآن نازل ہوا ہے چنانچہ قراءت قرآن کے بارے میں یہی اختلاف ونزاع حضرت عثمان رضی اللہ عنہ کے قرآن کریم کو کتا بی صورت میں جمع کر نے وکتابت کا حکم فرمانے کا اساسی وبنیادی سبب  تھا ۔

ابتدائی پانچ نسخے :

اس مہتم بالشان خدمت قرآن کی تکمیل کے بعد مشہور قول کے مطابق قرآن مجید کے پانچ نسخے لکھے گئے(الاتقان ج۱ص ۱۰۴۔)  یہ نسخے مدینہ طیبہ ، مکہ مکرمہ ،شام،بصرہ اور کوفہ روانہ کیے گئے ۔ دراصل سیدنا حضرت عثمان رضی اللہ عنہ کا منشا یہ تھا کہ صرف تحریر کردہ قرآنی نسخو ں ہی پر قناعت نہ کی جائے بلکہ براہ راست و با لمشافہ صحابہ کرام رضوان اللہ علیہم اجمعین کےمنہ سےقرآن سن کر اپنے سینوں میں محفوظ کرلیں اس لیے حضرت عثمان رضی اللہ عنہ جب کہیں کوئی قرآنی نسخہ روانہ فرماتےتو اس کیساتھ ایک معلم وقاری بھی بھیجتے تھے ۔ اس لئے مذکورہ پانچوں شہروں کیلئے  ممتاز صحابہ کرام رضوان اللہ علیہم اجمعین معلم اور نگران مقر ر کئے گئے ۔ اس سے یہ بھی معلوم ہوا کہ قرآن کریم کی تعلیم میں صرف قرآنی نسخےکا پڑھ لینا یا مطالعہ کر لینا کافی نہیں بلکہ کسی ماہر و مشاق معلم سے بالمشافہ سیکھنا ضروری ہے۔ چنانچہ مدینہ طیبہ میں حضرت زید بن ثابت رضی اللہ عنہ کو ، مکہ مکرمہ میں حضرت عبداللہ بن سائب ؓکو، شام میں حضرت مغیرہ بن شہاب رضی اللہ عنہ کو، بصرہ میں حضرت عامر بن عبد اللہ القیس رضی اللہ عنہ کو،اور کوفہ میں حضرت عبدالرحمٰن السلمی رضی اللہ عنہ کو نگراں مقرر کیا گیا ، (مناہل العرفان ج۱ص۳۹۶۔۳۹۷ )اور ایک نسخہ آپ نے اپنے لئے خاص فرما یا جسے  مصحف امام کہاجاتاہے ۔ اس طرح کل تعداد ان مصاحف کی چھ ہو گئی ۔ پھر بعض نے تعداد آٹھ بتائی ہے، اس اعتبا ر سے ساتواں بحرین اور آٹھواں یمن ارسال فرمایا ۔ بعض کے نزدیک آپ نے ایک نسخہ مصر بھی روانہ فرمایا (النشر:۱/۷) قرآنیت کے اصول ثلٰثہ میں سے ایک اصول یہ بھی ہے کہ جس قرآن کا رسم الخط مصاحف عثمانی کے مطابق ہو گا وہی قرآن کہا جائے گا، اس کےخلاف جائز نہیں۔

کہاں سے آیا مصحف ؟

قرآن مجید کو مصحف کا نام سب سے پہلے حضرت ابوبکر صدیق رضی اللہ عنہ کے دور خلافت میں دیا گیا  ۔ چنانچہ محمد بن عبداللہ بن اشتہ متوفی ۳۶۰ ھ اپنی کتاب "المصاحف " میں بطریق موسیٰ بن عقبہ روایت کر تے ہیں کہ جب قرآن کریم کو جمع کرکے اوراق پر لکھا گیا تو حضرت ابوبکر صدیق رضی اللہ عنہ نے فرمایا کہ اس کا کوئی نام مقرر کیا جائے ،بعض حضرات نے "السِّفر" (پیغامات) تجویز  کیا ،آپ نے فرمایا  یہ یہود کا تجویز کردہ نام ہے ،بعض نے حبشہ میں رائج نام یعنی "المصحف " تجویزکیا جس پر اتفاق ہوگیا اور قرآن مجید کو اَلمصحف کہا جانے لگا ۔ سید نا حضرت عثمان رضی اللہ عنہ نے مذکورہ بالاعلاقوں میں مصاحف روانہ کرکے یہ حکم جاری فرمایا کہ اس کےعلاوہ جس کےپاس بھی ذاتی قرآن کے نسخے موجود ہوں وہ حکومت کو بھیج  دئیے جائیں ، چنانچہ  دوسرے  تمام نسخے تلف کردئیے گئے ۔ اس میں شک نہیں کہ آپ کا یہ فیصلہ بہت سی حکمتوں اور مصلحتوں پر مبنی تھا ، کیونکہ بعد میں ان نسخوں کا وجود امت میں زبردست افتراق واختلاف کا سبب بن سکتا تھا، عہد رسالت مآب صلی اللہ علیہ وسلم سےجس قدر دوری ہوتی جاتی ، اسی  قدر یہ نسخے امت مسلمہ کیلئے  زیادہ مضرثابت ہوتے۔

فائدہ مہمہ:

یہ بات اظہر من الشمس ہے کہ قرآن کریم کے جن کلمات میں ایک سے زائد قراءتیں متواتر دلیل سے ثابت نہیں تھیں ان کو ایک ہی طرح سے لکھا جاتا تھا ،لیکن جن کلمات قرآنی میں بدلیل تواتر ایک سے  زائد قراءتیں تھیں  ان تمام قراءتوں کا اظہار صرف ایک ہی رسم الخط کے ذریعہ ہر جگہ ممکن نہ تھا ، اس لیے کتابت کرنے والے ایسے تمام کلمات کو  ایک نسخہ میں ایک متواتر  قراءت کے اظہار کیلئے ایک طرح ،اور دوسرے نسخہ میں دوسری متواتر قراءت کے اظہار کیلئے دوسری طرح، اور تیسری متواتر قراءت کے اظہار کیلئے تیسرے نسخے میں تیسری طرح لکھنے پر مجبور تھے ، اس مجبوری میں مصاحف میں تعدد  ناگزیر تھا ۔ بہرحال حضرت عثمان رضی اللہ عنہ کے اس اقدام کو سب  حضرات نے بڑی وقعت اور پسندید گی کی نگاہ سے دیکھا، قرآن کریم کے ذاتی وانفرادی نسخوں کے معدوم کیے جانے کا اقدام آپ رضی اللہ عنہ نے صحابہ کرام رضوان اللہ علیہم اجمعین کے مشوروں کے بعد کیا تھا ۔ چنانچہ حضرت علی کرم اللہ وجہہ فرمایا کرتے تھے کہ

" عثمان (رضی اللہ عنہ ) کے بارے میں بھلائی کے سوا کچھ نہ کہو، بخدا آپ نے مصاحف کے بارے میں جو کچھ بھی کیا وہ ہمارے مشورے کے مطابق اور ہماری موجودگی میں کیا "
(الاتقان ج۱ ص۱۰۳)  (بعض نےکہا کہ حضرت سوید بن غفلہؓ کا بھی یہی قول ہے ) بہرحال ان مصاحف عثمانی میں نقطے اور اعراب نہیں تھےجن کا فائدہ یہ تھا کہ مختلف قراءات پڑھی جاسکتی تھیں ، نیز ان میں آیات اور سورتوں کی بعینہ وہی ترتیب تھی جو کہ موجودہ قرآنی نسخوں میں ہے۔ اس امر میں بھی کوئی شک وشبہ نہیں کہ قرآن مجید فرقان حمید کے سو ا دنیا کی کسی کتاب کی حفاظت کیلئے وہ اہتمام نہیں کیا گیا جو قرآن کے حصے میں آیا ، قرآن کریم کے سوا دنیا میں کوئی کتاب  بطریق تواتر انسانوں تک نہیں پہنچی۔ارشاد باری تعالیٰ ہے
"لایأتیہ الباطل من بین یدیہ ولا من خلفہ تنزیل من حکیم حمید "
یعنی باطل اس قرآن میں نہ آگے سے آسکتا ہے نہ پیچھے سے (کسی راہ سے جگہ نہیں پاسکتا) یہ حکمت والے، سزاوارِ حمدوثنا کا نازل کردہ ہے ۔ چنانچہ قرآن مجید  کے لفظا ومعنیً،رسماً وکتابۃً ہر اعتبار سے خود رب العزت ہی محافظ ہیں ، قال تعالیٰ :
"اِنا نحن الذکر وانا لہ لحٰفظون "
خلاصہ یہ ہے کہ حضرت عثمان رضی اللہ عنہ کا امت مسلمہ پر یہ عظیم احسان ہے کہ آپ نے  رسم الخط وکتابت کی حد تک قرآن پاک میں وحدت کا رنگ پیدا کردیا ،"فجزاہ اللہ عن امۃ محمد صلی اللہ علیہ وسلم  خیرالجزاء"۔

دور حاضر کے  مصاحف :

دور حاضر میں عالم اسلام میں جو مصاحف کہ مروج اور متداول ہیں ،ان میں بیشتر کارسم عموما ًمصاحف عثمانیہ کے رسم ِعثمانی کےمطا بق ہے، چاہے وہ مصحف حفص ہو کہ زیادہ تر مصر، شام یا  سعودیہ میں رائج ہے ،جسے مصحف مشارقہ بھی کہاجاتا ہے ،یا وہ روایت ورش اور قالون والا مصحف ہو جسے مصحف مغاربہ کہاجاتاہے،اور مراکش ، الجزائر ، اور موریطانیہ وغیرہ میں متداول ہے ، یا وہ مصحف نستعلیق (خط نسخ) ہو جو بر صغیر میں مطبوع  اور معمول بہ ہے ،" مجمع ملک فھد " میں بھی اسی نسخہ کو مصحف  تاج یا نستعلیق (خط نسخ ) کا نام دیا گیا ہے ۔ مذکورہ تین قسم کے مصاحف ہی عالم اسلام یا بلاد اسلامیہ میں پائے جاتے ہیں ۔ ان مصاحف میں خصوصا ًحذف الف اور اثبات الف کے اعتبار سے جو فرق مشاہدے میں آیا ہے اس کی اصل بنیاد و دلیل  در اصل وہ قدیم مصاحف ہیں جن میں اوپر سے یہ اختلاف چلاآتاہے ، جبکہ ائمہ رسم اور  محققین علماء نے بھی بنیاد انہی مصاحف کو بنایا ہے ،ان میں امام دانی صاحب "المقنع" متوفی ۴۴۴ھ اور ان کے ارشد تلمیذ امام ابو داؤد بن نجاح کے اسمائے گرامی نمایاں ہیں ۔ اب قرآنی کلمات میں الف کے حذف و اثبات میں اختلاف کے پیش نظر پاکستان میں متداول مصحف تاج یا مصحف نستعلیق کے متعلق بعض  سطحی نظر رکھنے والے حضرات مسلسل یہ پرو پیگنڈہ کررہے ہیں کہ اس پاکستانی مصحف تاج کا رسم غلط اور بلادلیل ہے، جبکہ حذف  الف واثبات الف کے دونوں منہج درست ہیں ۔                         

برصغیر کے متداول مصاحف :

چنانچہ جمع مذکر سالم میں سولہ کلمات، جمع مؤنث سالم میں سات کلمات اور ان کے علاوہ الف سے یاءتک تمام حروف کے بعد آنے  والے الف کے مختلف کلمات میں یہی صورتحال ہے کہ حذف الف واثبات الف میں امام دانی اور امام ابو داؤد کا مؤقف کہیں ایک ہے، کہیں مختلف  ہے ، اس بارے میں تقریبا تین سو کلمات ایسے مذکور ہیں کہ جن میں حذف الف واثبات الف کی بنیاد ائمہ کے نصوص وروایات اور قدیم مصاحف پر قائم ہے ، مصاحف مشارقہ اور مغاربہ میں با لعموم امام ابو داؤد  بن نجاح  کی تصریحات کو بنیادی حیثیت دی گئی ہے ، جبکہ بر صغیر کے متداول مصاحف میں امام دانی کے نصوص و تصریحات پر عمل  کیا گیا ہے، لہذا بیک جنبشِ قلم اسکی تغلیط نہیں کی جاسکتی ، کیونکہ منہج دونوں صحیح ہیں اور کسی میں رسم عثمانی کی کوئی خلاف ورزی نہیں کی گئی ۔ ان تمام مناہج کے اصول و ضوابط اور ان کےدلائل امام ابو عمرو دانی کی "المقنع " اور امام ابوداؤد بن بجاح کی" التبیین  لھجاء التنزیل " اور امام شاطبی ضریرؒ کی " عقیلۃ أتراب القصائد" میں موجود ہیں۔  البتہ رسم عثمانی کے جن کلمات میں امام ابو عمرو دانیؒ اور امام ابو داؤدؒ  میں باہمی اتفاق ہے وہاں مصحف تاج میں بھی اسی رسم کی پابندی کی گئی ہے، جہاں اختلاف ہے ان میں ا مام دانی ؒکی تصریحات پر دارو مدار رکھا گیا ہے ، کچھ کلمات ایسے بھی ہیں جن میں امام شاطبی کےنصوص کو مد نظر رکھا گیا ہے اور خاص ان کلمات میں امام شاطبی کا مؤقف امام ابو عمرو دانی سے الگ ہے ۔ اسی طرح اس مصحف تاج میں تقریبا دس کلمات ایسے ہیں جو اس منہج سےمختلف ہیں ،ان میں یا تو امام ابو داؤد یا کسی دوسرے رسم عثمانی کے امام کے قول کولیا گیا ہے ،چند کلمات ایسے بھی ہیں کہ جن میں بعض قراءات متوترہ کی بنا ء پر حذف  الف کو اختیار کیا گیا ہے ، اس مصحف تاج اور دوسرے  مصاحف خصوصا مصحف مدینہ کے مابین موازنہ کرنےسے معلوم ہو تا ہے کہ کل" ۱۷۴۶ "کلمات رسم میں یہ فرق ہے ،جن میں تقریبا ۹۸ فیصد میں مصحف تاج میں امام ابو عمرو دانی کے منہج کو لیا گیا ہے، اور مصحف مدینہ میں امام ابو داؤد کا منہج اختیار کیا گیا ہے ۔

مخصوص لابی کی کارستانی :

ا ب چند سال سے پاکستان میں ایک مخصوص لابی پاکستانی مصاحف کے رسم اور ضبط  سےمتعلق شکوک وشبہات پھیلارہی ہے ،چونکہ اس مسئلہ پر کوئی مدلل اور مرتب دستاویز منظر عام پر نہ تھی جس کی وجہ سے عالم عرب کے بعض اسکا لر ز اور ان کی دیکھا دیکھی بعض ہمارے پاکستانی اسکالر ز بھی اس کاغلط فہمی کا شکار ہو گئے کہ عالم عرب میں متداول اور مروج مصاحف خواہ وہ مصری ہوں یا مدنی  وہ تو رسم عثمانی کے عین مطابق ہیں اور پاکستانی مصاحف رسم عثمانی کے خلا ف ہیں ،لہذا اب پہلے سے کہیں زیادہ ضروری ہوگیا ہے کہ رسم قرآنی اور برصغیر ہند، پاک  کے مروج  مصاحف سے مدلل ومرتب دستاویز ی ثبو ت کیساتھ کتاب ترتیب دی جائے ،جس میں ساری جزئیات ،تفصیلات اور مقامات درج ہوں اور دلائل واضحہ سے اس مسئلہ کو مبرہن کیا جائے ، امت مسلمہ کو آگاہ ہی دی جائے ،اور ان کی آنکھیں کھولی جائیں ،انہیں معلوم ہوکہ امت مرحومہ نے کبھی بھی کسی گمراہی اور سنگین غلطی پر اتفاق نہیں کیا ، اور ان شاءاللہ کبھی کرے گی بھی نہیں ،چہ جائے کہ رسم قرآنی پر پورے برصغیر کے اہل علم ارباب رسم محققین ،ائمہ قراءت ومجودین ،ماہرین فن قاطبۃً کتاب اللہ کے رسم پر یکے بعد دیگرے ضلالت و غوایت کاشکار ہو جائیں :کلا وحاشا

فتنہ کا سدباب :

اس فتنے کا سد باب کر نے کیلئے ضروری ہے کہ پاکستان کی وزارت مذہبی امور پاکستان میں طبع ہونے والے تمام مصاحف قرآنی میں اپنے رسم عثمانی کی پوری حفاظت وپابندی کرے، ان میں واقعۃ جو اغلاط ہوں ان کی درستگی کیلئے  ماہرین رسم عثمانی اہل علم وفضل کا انتخاب  کرے ،اس کا مر بوط ومستحکم نظم قائم کرے تاکہ قرآنی نسخوں کی طباعت میں رسم عثمانی کی پابندی کو یقینی بنایا جاسکے ۔ تاج کمپنی ودیگر مطابع ،اہل علم محققین علمائے رسم کا ایک بورڈ تشکیل دیں جو ان اغلاط کی درستگی کا اہتمام کرے جو فی الواقع اصل رسم کی  رُو سے قابل اصلاح ہیں اور جن کی نشاندہی مختلف مقالوں میں کردی گئی ہے۔