روزہ؛ دیگر اقوام میں

ایس اے ساگر
قرآن مجید میں روزے کا حکم نازل ہوا تو
اللہ تعالیٰ نے اس کے ساتھ ہی اس حقیقت کی طرف بھی اشارہ کر دیا کہ تم پر روزوں کا یہ فرض کیا جانا کوئی نئی بات نہیں ہے۔ ہم نے تم سے پہلی امتوں پر بھی روزے اسی طرح فرض کیے تھے جیسے تم پر کئے جا رہے ہیں۔

ارشادِ خداوندی ہے:

“شھر رمضان الذی انزل فیہ القراٰن ھدًی للناس وبینٰت من الھدٰی والفرقان، فمن شھد منکم الشھر فلیصمہ، ومن کان مریضًا او علٰی سفر فعدة من ایام اخر، یرید الله بکم الیسر ولا یرید بکم العسر ولتکملوا العدة ولتکبروا الله علٰی ما ھدٰکم ولعلکم تشکرون۔” 

(البقرة:۱۸۵)

ترجمہ:…”ماہِ رمضان ہے جس میں قرآن مجید بھیجا گیا، جس کا وصف یہ ہے کہ لوگوں کے لئے (ذریعہ) ہدایت ہے اور واضح الدلالت ہے، من جملہ ان کتب کے جو (ذریعہ) ہدایت (بھی) ہیں اور (حق و باطل میں) فیصلہ کرنے والی (بھی) ہیں۔ سو جو شخص اس ماہ میں موجود ہو اس کو ضرور اس (ماہ) میں روزہ رکھنا چاہئے، اور جو شخص بیمار ہو یا سفر میں ہو تو دُوسرے ایام کا (اتنا ہی) شمار (کرکے ان میں روزہ) رکھنا (اس پر واجب) ہے۔ اللہ تعالیٰ کو تمھارے ساتھ (اَحکام میں) آسانی کرنا منظور ہے اور تمھارے ساتھ (اَحکام و قوانین مقرّر کرنے میں) دُشواری منظور نہیں، اور تاکہ تم لوگ (ایام ادا یا قضا کی) شمار کی تکمیل کرلیا کرو (کہ ثواب میں کمی نہ رہے) لہٰذا تم لوگ اللہ تعالیٰ کی بزرگی (و ثنا) بیان کیا کرو اس پر کہ تم کو (ایک ایسا) طریقہ بتلادیا (جس سے تم برکات و ثمراتِ رمضان سے محروم نہ رہوگے) اور (عذر سے خاص رمضان میں روزہ نہ رکھنے کی اجازت اس لئے دے دی) تاکہ تم لوگ (اس نعمتِ آسانی پر اللہ کا) شکر ادا کیا کرو۔” (ترجمہ حضرت تھانوی رحمہ اللہ)

احادیثِ مبارکہ:

حدیث:… حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: 

“جب رمضان داخل ہوتا ہے تو آسمان کے دروازے کھل جاتے ہیں (اور ایک روایت میں ہے کہ: جنت کے دروازے۔ اور ایک اور روایت میں ہے کہ: 

رحمت کے دروازے کھل جاتے ہیں)، اور جہنم کے دروازے بند ہوجاتے ہیں، اور شیاطین پابندِ سلاسل کردئیے جاتے ہیں۔”
(بخاری و مسلم)
حضرت معاذ، حضرت ابن مسعود، حضرت ابن عباس رضوان اللہ علیہم اجمعین اور عطا، قتادہ اور ضحاک رحمہم اللہ کا فرمان ہے کہ حضرت نوح علیہ السلام کے زمانہ سے ہر مہینہ مں تین روزوں کا حکم تھا پھر حضور صلی اللہ علیہ والہ وسلم کی امت کے لئے اس حکم کو بدل دیا گیا اور ان پر مبارک مہینہ رمضان کے روزے فرض ہوئے۔ حضرت حسن بصری رحمہ اللہ  فرماتے ہیں کہ گزشتہ امتوں پر بھی ایک مہینہ کامل کے روزے فرض تھے۔ ایک مرفوع حدیث میں ہے کہ رمضان کے روزے تم سے اگلی اُمتوں پر فرض تھے۔ حضرت ابن عمر رضی اللہ عنہ فرماتے ہیں کہ اگلی امتوں کو یہ حکم تھا کہ جب وہ عشاء کی نماز ادا کر لیں اور سو جائیں تو ان پر کھانا پینا اور عورتوں سے مباشرت کرنا حرام ہوجاتا تھا۔ حضرت ابن عباس رضی اللہ عنہ فرماتے ہیں گزشتہ اُمتوں سے مراد اہل کتاب ہیں۔ ایک روایت کے مطابق حضرت آدم علیہ السلام پر ہر ماہ کے ایام بیض (١٣،١٤ ،١٥ تاریخوں) کے روزے فرض تھے۔ یہودیوں پر عاشورہ کا روزہ فرض تھا اور ہر ہفتہ کے ہفتہ کے روز و دیگر چند روزے بھی فرض تھے۔ نصاریٰ پر رمضان المبارک کا روزہ فرض تھا، لیکن موسم گرما میں رمضان کا مہینہ آجانے کی وجہ سے یہ لوگ روزوں سے کترانے لگے اور اس کے بدلے موسم ربیع میں پچاس روزے رکھنے لگے۔
روزہ کا ایک طریقہ یہ ہے کہ انسان بات چیت اور گفتگو سے رک جائے۔ یہ طریقہ یہودیوں میں رائج تھا۔ قرآن کریم میں حضرت مریم علیہا السلام کی زبان میں اس کی تعبیر یوں ہے آج کسی انسان سے بات نہیں کروں گی۔”
(مریم)
اسپنسر اور جیلن نے اپنی تصانیف میں وسطی آسٹریلیا کے باشندوں کے حالات میں لکھا ہے کہ جب کسی عورت کا شوہر مرجاتا تھا تو اس کی بیوی سال بھر بات نہ کرنے کا روزہ رکھتی تھی۔ ناجائز باتوں اور حرام گفتگو سے بچنا اسلام میں ثواب ہے، لیکن خاموش رہنے کا روزہ رکھنا اسلام میں کالعدم اور منسوخ کردیا گیا ہے۔
اسلام اور روزہ:
مسلمانوں پرصیام رمضان کی فرضیت 2 ھ میں ہوئی۔ اس سے قبل حضور صلی اللہ علیہ والہ وسلم اور صحابہ کرام رضوان اللہ علیہم اجمعین عاشورہ (دسویں محرم الحرام) اور ایام بیض (قمری ماہ کی 15,14,13 تاریخوں) کے روزے رکھتے تھے۔ (اللباب جلد 1 صفحہ 162) ۔ صوفیاء کرام رحمہم اللہ نے لکھا ہے کہ شجر ممنوعہ کے استعمال سے حضرت آدم علیہ السلام کے اندر جو جراثیم باقی رہ گئے تھے، ان کے خاتمے کے لئے حضرت آدم علیہ السلام نے تیس روزے رکھے تھے جنہیں بعد میں نبی آخرالزمان اور ان کے امتیوں پر فرض کیا گیا ہے۔
1. اسلام میں روزے کے اندر تین بار تبدیلیاں ہوئیں ہیں۔ نبی اکرم صلی اللہ علیہ وسلم جب مدینہ میں تشریف لائے تو ہر مہینہ میں تین روزے رکھتے تھے اور عاشورے کا روزہ رکھا کرتے تھے یہ پہلی تبدیلی تھی۔ پھر اللہ تعالیٰ نے
”کتب علیکم الصیام”
نازل فرماکر رمضان کے روزے فرض کئے۔
2. رمضان کے روزے فرض ہونے کے بعد شروع میں یہ حکم تھا کہ جو چاہے روزہ رکھے، جو چاہے روزہ نہ رکھے اور فدیہ دیدے۔ پھر یہ آیت اُتری
”فمن شھد منکم الشھر فلیصمہ”
تم میں سے جو شخص رمضان کے مہینے میں اقامت کی حالت میں ہو، وہ روز رکھا کرے پس جو شخص مقیم ہو مسافر نہ ہو، تندرست ہو، بیمار نہ ہو، اس پر روزہ رکھنا ضروری ہوگیا۔ ہاں بیمار اور مسافر کے لئے رخصت ملی اور ایسا بوڑھا معذور جو روزے کی طاقت ہی نہ رکھتا ہو، اسے بھی رخصت دی گئی۔ یہ دوسری تبدیلی تھی۔
3. تیسری تبدیلی یہ ہوئی کہ ابتدا میں کھانا پینا عورتوں کے پاس آنا سونے سے پہلے پہلے جائز تھا، سو گیا تو پھر گو رات ہی کو جاگے لیکن کھانا پینا اور جماع اس کے لئے منع تھا۔ پھر صرمہ نامی ایک انصاری صحابی دن بھر کام کاج کرکے رات کو تھکے ہارے گھر آئے، عشاء کی نماز ادا کی اور نیند آگئی، دوسرے دن کچھ کھائے پئے بغیر روزہ رکھا، لیکن حالت بہت نازک ہوگئی. حضور اکرم صلی اللہ علیہ وسلم نے پوچھا کہ یہ کیا بات ہے؟
انھوں نے سارا واقعہ سنا دیا۔ یہ واقعہ تو ان کے ساتھ ہوا، ادھر حضرت عمر رضی اللہ عنہ نے سوجانے کے بعد اپنی بیوی سے جماع کرلیا اور نبی کریم صلی اللہ علیہ وسلم کے پاس آکر حسرت و افسوس کے ساتھ اپنے اس قصور کا اقرار کیا۔ ان دونوں واقعات کے بعد یہ آیت
”احل لکم لیلۃ الصیام الرفث الٰی نسائکم”
سے
”ثم اتموا الصیام الی الیل”
تک نازل ہوئی اور مغرب کے بعد سے لے کر صبح صادق کے طلوع ہونے تک رمضان کی راتوں میں کھانے پینے اور اپنی بیوی سے جماع کرنے کی رخصت دی گئی۔
اسماعیلیہ اور روزہ:
ان کے نزدیک زکوٰۃ کے بدلے دسواں حصہ امام زمانہ کو دینا لازم ہے۔ حج کے بدلے امام زمانہ کا دیدار ہے۔ پہلے یہ لوگ بمبئی حج کرنے جاتے تھے۔ اب وہ بھی منسوخ ہے۔ روزہ ان کے مذہب میں فرض نہیں ہے۔
آغا خانی اور روزہ:
روزہ تو اصل میں آنکھ، کان، اور زبان کا ہوتا ہے، کھانے پینے سے روزہ نہیں ٹوٹتا۔ ان کا روزہ سوا پہر کا ہوتا ہے جو صبح دس بجے کھول لیا جاتا ہے۔ وہ بھی اگر مومن رکھنا چاہے ورنہ فرض نہیں ہے۔ البتہ سال بھر میں مہینے کا چاند جب بھی جمعہ کے روز کا ہوگا اس دن یہ لوگ روزہ رکھتے ہیں۔
نصیریہ اور روزہ:
فرقہ نصیریہ کے متبعین زکوٰۃ کے قائل نہیں ہیں البتہ اپنی کمائی کا پانچواں حصہ بنام امام دیتے ہیں۔ ان کا روزہ صرف بیوی کی میل میلاپ سے بچنا ہے۔ یہ لوگ کہتے ہیں کہ تیس مردوں اور تیس عورتوں سے بات چیت ترک کردینا روزہ ہے۔
عیسائی اور روزہ:
ان کے نزدیک صرف حیوان اور چربی والی چیزوں کو کھانے سے بچنے کا نام روزہ ہے۔
یہودیوں کا روزہ:
ان کے نزدیک صرف عید یوم التکفیر، جس کو یوم التوبہ بھی کہا جاتا ہے کے دن روزہ ہے۔ یہ یہودی کیلنڈر کے مطابق دسویں مہینے کو منائی جاتی ہے۔ اس میں نو دن تک دنیاوی رشتہ ختم کرنا، عبادت کرنا، روزے رکھنا اور کھانا پینا چھوڑ دینا ہوتا ہے۔ اس کو یوم کپر اور یوم کفارہ بھی کہا جاتا ہے۔
پرانے زمانے میں یہودی ہفتہ کے دن اور ہر چاند کے ماہ پہلی تاریخ کو روزہ رکھا کرتے تھے ان دنوں میں کوئی کام نہیں کیا کرتے تھے، اس کے بعدیہ روزہ ختم ہوگیا۔ ان سے کہا گیا کہ وہ ان دنوں میں صرف کام نہ کریں۔ یہودیوں کا سب سے اہم روزہ عیسوی ماہ کی دسویں تاریخ کا روزہ ہے۔ جسے وہ کفارہ کے دن کا روزہ کہتے ہیں۔ یہ روزہ یہودیوں پر اپنے گناہوں سے معافی کے تعلق سے فرض کیا گیا ہے۔
بدھ مت اور روزہ:
واسوWasco (جولائی) اس ماہ کے پورے چاند کے موقع پر مہاتما بدھ کی زندگی کے واقعات کے حوالے سے تقریبات ہوتی ہیں۔ اس ماہ سے بدھ کے چلے کا بھی آغاز ہوتا ہے جو تین مہینے تک جاری رہتا ہے۔ ان تین مہینوں میں بھکشوؤں کو سفر کرنے کی اجازت نہیں ہوتی۔ چلے کے دوران مخصوص احکامات پر عمل بھی کرنا ہوتا ہے اور موسیقی، رقص، خوشبو، اونچی جگہ (آرام دہ بستر اور پلنگ) پر سونے سے بچنا ہوتا ہے، اس عرصہ میں شادی بیاہ کی اجازت نہیں ہے۔ ان تینوں مہینوں میں دن کے بارہ بجے کے بعد روزہ رکھنا ہوتا ہے۔ یہ چلہ اکتوبر میں ختم ہوتا ہے۔
بودھ مذہب کے پیروکار چاند کی پہلی تاریخ، نویں تاریخ، پندرھویں تاریخ اور بائیسویں تاریخ کو طلوع آفتاب سے غروب آفتاب تک روزہ رکھتے ہیں اور وہ ان چار دنوں میں پورا آرام کرتے ہیں۔ روزے میں آگ کی پکی ہوئی چیزوں کے علاوہ بقیہ چیز (پھل فروٹ) کھا سکتے ہیں۔
فرقہ صابئہ مندائیون اور روزہ:
ان کا روزہ یہ ہے کہ پورے سال میں 36 دن گوشت سے پرہیز کرنا ہے۔ ابن ندیم رحمہ اللہ متوفی 385ھ / 1004ء نے اپنی کتاب 'الفہرست' میں اور ابن عبری متوفی 685ھ / 1286ء نے اپنی کتاب ”تاریخ مختصر الدول” میں صراحت کی ہے کہ یہ لوگ بھی شروع میں مسلمانوں کی طرح تیس روزے رکھتے تھے لیکن بعد میں تبدیلی کردی گئی۔
برہمن اور روزہ:
برہمنوں میں جوگی خزاں اور بہار کے شروع موسم میں روزہ رکھتے ہیں۔ چھتری ،سردی اور گرمی کے شروع موسم کے علاوہ ہر چاند کے ماہ کے شروع دو دنوں میں اور چودھویں تاریخ کا روزہ رکھتے ہیں۔
فرقہ یزیدیہ اور روزہ:
یہ لوگ پورے سال میں صرف تین روزے رکھتے ہیں اور عید میلاد یزید مناتے ہیں۔
ذکری فرقہ اور روزہ:
ان کے نزدیک رمضان کے روزے منسوخ ہیں، اس کے بدلے میں ذوالحجہ کے ابتدائی دس دنوں کے روزے رکھنے ہیں۔
فرقہ بلالی اور روزہ:
یہ لوگ رمضان المبارک کے بجائے دسمبر میں روزے رکھتے ہیں۔
http://www.suffahpk.com/roza-or-mazahib-aalam/