Tuesday 30 June 2015

کیا کریں...کیا نہ کریں!!!

ﻣﻔﺘﯽ ﻣﺤﻤﺪ ﻓﺎﺭﻭﻕ ﻋﻠﻮﯼ ﺻﺎﺣﺐ ﮐﺎ ﺗﺤﻔﮧ !
ﺍﺻﻞ ﻣﯿﮟ ﮨﺮ ﻓﻘﮩﯽ ﻣﺬﮨﺐ ﺍﻧﺪﺭ ﺳﮯ ﭨﻮﭦ ﭘﮭﻮﭦ ﮐﺎ ﺷﮑﺎﺭﮨﮯ ﺍﻭﺭ ﮐﺸﻤﮑﺶ ﻣﯿﮟ ﻣﺒﺘﻼ ﮨﮯ، ﭘﮩﻠﮯ ﺷﺎﻓﻌﯽ ﻭ ﺣﻨﻔﯽ ﺍﯾﮏ ﺩﻭﺳﺮﮮ ﮐﮯ ﻣﻘﺎﺑﻞ ﺗﮭﮯ ﺍﺏ ﺷﺎﻓﻌﯽ ﺷﺎﻓﻌﯽ ﮐﮯ ﺍﻭﺭ ﺣﻨﻔﯽ ﺣﻨﻔﯽ ﮐﮯ ﻣﻘﺎﺑﻞ ﮨﮯ، ﺍﺱ ﻟﯿﮯ ﮨﺮ ﻓﻘﮩﯽ ﻣﺬﮨﺐ ﺑﻈﺎﮨﺮ ﺭﻭﺍﺩﺍﺭﯼ ﮐﮯ ﺑﺎﻭﺟﻮﺩ ﺍﭘﻨﯽ ﺑﻘﺎﺀ ﮐﯽ ﺁﺧﺮﯼ ﺟﻨﮓ ﻟﮍ ﺭﮨﺎ ﮨﮯ۔
ﻋﺎﺻﻢ ﺑﺨﺸﯽ ﺻﺎﺣﺐ ﮐﯽ ﺑﺎﺕ ﺳﮯ ﺍﺗﻔﺎﻕ ﮨﮯ، ﯾﮩﺎﮞ ﮨﻤﺎﺭﮮ ﮨﺎﮞ ﺑﺮﻃﺎﻧﯿﮧ ﻣﯿﮟ ﻓﯿﮑﭩﺮﯼ ﻣﯿﮟ ﮐﺎﻡ ﮐﮯ ﺩﻭﺭﺍﻥ ﮨﺮ ﻧﻤﺎﺯ ﮐﮯ ﻟﯿﮯ ﭼﮭﭩﯽ ﻧﮩﯿﮟ ﻣﻠﺘﯽ ﺗﻮ ﻟﻮﮒ ﺟﻤﻊ ﺑﯿﻦ ﺍﻟﺼﻼﺗﯿﻦ ﮐﺮ ﺭﮨﮯ ﮨﯿﮟ، ﯾﻮﻧﯿﻮﺭﺳﭩﯽ ﺍﻭﺭ ﮐﺎﻟﺠﺰ ﻣﯿﮟ ﺳﯿﻨﮑﮍﻭﮞ ﻣﺴﻠﻢ ﻃﻠﺒﺎﺀ ﺟﻤﻌﮧ ﭘﮍﮪ ﺭﮨﮯ ﮨﯿﮟ ، ﺍﺳﯽ ﻃﺮﺡ ﯾﮩﺎﮞ ﺟﯿﻠﻮﮞ ﻣﯿﮟ ﺑﮭﯽ ﺟﻤﻌﮧ ﻭ ﻋﯿﺪﯾﻦ ﺑﺎ ﺟﻤﺎﻋﺖ ﮨﻮﺗﯽ ﮨﯿﮟ ﺟﺒﮑﮧ ﺑﻌﺾ ﻓﻘﮩﯽ ﻣﺬﺍﮨﺐ ﮐﯽ ﺭﻭ ﺳﮯ ﻣﺬﮐﻮﺭﮦ ﻣﻘﺎﻣﺎﺕ ﻣﯿﮟ ﺟﻤﻌﮧ ﮐﯽ ﺷﺮﺍﺋﻂ ﻣﻔﻘﻮﺩ ﮨﯿﮟ ، ﺳﻔﺮ ﮐﮯ ﺩﻭﺭﺍﻥ ﺣﻨﻔﯽ ﺍﮐﺜﺮﯾﺖ ﺟﻤﻊ ﺗﻘﺪﯾﻢ ﻭ ﺗﺎ ﺧﯿﺮ ﮐﺮﺭﮨﯽ ﮨﮯ، ﺍﺳﯽ ﻃﺮﺡ ﺩﻭﺭﺍﻥ ﺳﻔﺮ ﺳﺮﻭﺳﺰ ﭘﺮ ﺟﺐ ﻭﺿﻮ ﮐﯿﺎ ﺟﺎﺗﺎ ﮨﮯ ﺗﻮ ﺳﯿﻨﮏ ﻣﯿﮟ ﭘﺎﺅﮞ ﺩﮬﻮﻧﮯ ﮐﻮ ﯾﮩﺎﮞ ﮐﮯ ﻟﻮﮐﻞ ﮔﻮﺭﮮ ﺑﺎﺷﻨﺪﮮ ﺑﮩﺖ ﺑُﺮﺍ ﺳﻤﺠﮭﺘﮯ ﮨﯿﮟ ﺍﺱ ﻟﯿﮯ ﻟﻮﮒ ﺟﺮﺍﺑﻮﮞ ﭘﺮ ﻣﺴﺢ ﮐﺮ ﻟﯿﺘﮯ ﮨﯿﮟ ﺍﻭﺭ ﻭﮦ ﺑﮭﯽ ﻣﺴﺢ ﮐﺮﺗﮯ ﮨﯿﮟ ﺟﻦ ﮐﮯ ﺍﺋﻤﮧ ﻧﮯ ﺍﺱ ﻣﺴﺢ ﮐﻮ ﻧﺎﺟﺎﺋﺰ ﮐﮩﺎ ﮨﮯ ﺍﻭﺭ ﺍﻥ ﮐﮯ ﭘﯿﺮﻭﮐﺎﺭ ﺑﮭﯽ ﺟﻦ ﮐﮯ ﻣﻘﺘﺪﺍﺅﮞ ﻧﮯ ﺳﺨﺖ ﺷﺮﺍﺋﻂ ﻋﺎﺋﺪ ﮐﯽ ﮨﯿﮟ۔
ﺍﮔﺮ ﺍﺣﺒﺎﺏ ﻧﺎﺭﺍﺽ ﻧﮧ ﮨﻮﮞ ﺗﻮ ﮨﻢ ﻋﺮﺽ ﮐﺮﯾﮟ ﮔﮯ ﺷﺮﻭﻉ ﻣﯿﮟ ﺑﮩﺖ ﺳﮯ ﻓﻘﮩﯽ ﻣﺬﺍﮨﺐ ﻭﺟﻮﺩ ﻣﯿﮟ ﺁﺋﮯ ﺗﮭﮯ، ﺍﺏ ﺟﻦ ﮐﻮ ﮐﺴﯽ ﺣﮑﻮﻣﺖ ﮐﯽ ﭘﺸﺖ ﭘﻨﺎﮨﯽ ﻣﻞ ﮔﺌﯽ ﻭﮦ ﺯﻧﺪﮦ ﺭﮨﮯ ﺍﻭﺭ ﺩﻭﺳﺮﮮ ﺧﺘﻢ ﮨﻮﮔﺌﮯ، ﺳﺐ ﺳﮯ ﺯﯾﺎﺩﮦ ﺣﮑﻮﻣﺘﯽ ﺳﮩﺎﺭﺍ ﻓﻘﮧ ﺣﻨﻔﯽ ﮐﻮ ﻣﻼ ﺍﻭﺭ ﻭﮦ ﺳﺐ ﺳﮯ ﺯﯾﺎﺩﮦ ﭘﮭﯿﻼ، ﭘﮭﺮ ﺷﺎﻓﻌﯽ ﻭ ﻣﺎﻟﮑﯽ ﻓﻘﮧ ﮐﻮ ﻣﻼ ﻭﮦ ﺑﮭﯽ ﭘﻨﭗ ﮔﺌﯿﮟ، ﺣﻨﺒﻠﯽ ﻓﻘﮧ ﯾﺘﯿﻢ ﺭﮨﯽ ﯾﮩﺎﮞ ﺗﮏ ﮐﮧ ﺳﻌﻮﺩﯾﻮﮞ ﮐﺎ ﺳﮩﺎﺭﺍ ﺍﺳﮯ ﻣﯿﺴﺮ ﺁﯾﺎ ﺗﻮ ﯾﮧ ﺑﮭﯽ ﺯﻧﺪﮦ ﮨﻮﮔﺌﯽ، ﺍﺱ ﻭﻗﺖ ﻓﻘﮧ ﺣﻨﻔﯽ ﮐﻮ ﺍﻗﺘﺪﺍﺭ ﮐﺎ ﺳﮩﺎﺭﺍ ﻧﮩﯿﮟ ﮨﮯ ﺍﻭﺭ ﻭﮦ ﺳﺐ ﺳﮯ ﺯﯾﺎﺩﮦ ﭨﻮﭦ ﭘﮭﻮﭦ ﮐﺎ ﺷﮑﺎﺭ ﮨﮯ ﺟﺒﮑﮧ ﺷﺎﻓﻌﯽ ﻣﺎﻟﮑﯽ ﺍﻭﺭ ﺣﻨﺒﻠﯽ ﻓﻘﮧ ﮐﻮ ﺍﺱ ﻭﻗﺖ ﺑﮭﯽ ﻋﺮﺏ ﺍﻭﺭ ﺍﻓﺮﯾﻘﮧ ﻣﯿﮟ ﺑﻌﺾ ﺣﮑﻮﻣﺘﻮﮞ ﮐﺎ ﺳﮩﺎﺭﺍ ﮨﮯ ﺍﺱ ﻟﯿﮯﺍﻥ ﮐﺎ ﺍﻗﺒﺎﻝ ﺍﺑﮭﯽ ﭼﻞ ﺭﮨﺎ ﮨﮯ، ﺍﻥ ﮐﮯ ﻣﻘﺎﺑﻠﮧ ﻣﯿﮟ ﺳﻔﯿﺎﻥ ﺛﻮﺭﯼ ، ﺍﺑﻦ ﺣﺰﻡ، ﻣﻌﺘﺰﻟﮧ، ﺧﻮﺍﺭﺝ ﮐﻮ ﺩﯾﮑﮭﯿﮟ ﺗﻮ ﺍﻥ ﮐﮯ ﻓﻘﮩﯽ ﻣﺴﺎﻟﮏ ﮐﺘﺎﺑﻮﮞ ﻣﯿﮟ ﻣﻞُ ﺟﺎﺗﮯ ﮨﯿﮟ ﻟﯿﮑﻦ ﮔﺮﺍﺅﻧﮉ ﭘﺮ ﻣﺮ ﭼﮑﮯ ﮨﯿﮟ۔
ﺍﻟﺒﺘﮧ ﻓﻘﮧ ﺍﻣﺎﻣﯿﮧ ﯾﺎ ﻓﻘﮧ ﺟﻌﻔﺮ ﯾﮧ ، ﺍﺱ ﺳﮯ ﺑﺤﺚ ﻧﮩﯿﮟ ﮐﮧ ﻭﮦ ﺻﺤﯿﺢ ﮨﮯ ﯾﺎ ﻏﻠﻂ ، ﻟﯿﮑﻦ ﺩﺍﺩ ﺩﯾﻨﯽ ﭘﮍﮮ ﮔﯽ ﮐﮧ ﺍﺱ ﻓﻘﮧ ﮐﻮ ﻣﺎﻧﻨﮯ ﻭﺍﻟﮯ ﺍﯾﮏ ﺗﻮ ﮨﻤﯿﺸﮧ ﺍﻗﻠﯿﺖ ﻣﯿﮟ ﺭﮨﮯ، ﺩﻭﺳﺮﮮ ﮨﻤﯿﺸﮧ ﺯﯾﺮ ﻋﺘﺎﺏ ﺭﮨﮯ، ﺍﮔﺮ ﮐﺒﮭﯽ ﺣﮑﻮﻣﺖ ﺑﻨﯽ ﺑﮭﯽ ﺗﻮ ﺑﮩﺖ ﺟﻠﺪ ﻣﭩﺎﺩﯼ ﮔﺌﯽ، ﺍﻥ ﺗﻤﺎﻡ ﺷﺪﺗﻮﮞ ﺍﻭﺭ ﻣﺠﺒﻮﺭﯾﻮﮞ ﮐﮯ ﺑﺎﻭﺟﻮﺩ ﯾﮧ ﻓﻘﮧ ﺯﻧﺪﮦ ﺭﮨﯽ، ﺗﺴﻠﺴﻞ ﺑﮭﯽ ﻗﺎﺋﻢ ﺭﮨﺎ ﺍﻭﺭ ﺍﮨﻠﺴﻨﺖ ﮐﯽ ﻃﺮﺡ ﺍﻧﮩﻮﮞ ﻧﮯ ﮐﺒﮭﯽ ﺍﭘﻨﮯ ﺍﻭﭘﺮ ﺍﺟﺘﮩﺎﺩ ﮐﮯ ﺩﺭﻭﺍﺯﮮ ﺑﻨﺪ ﻧﮩﯿﮟ ﮐﯿﮯ ﺍﻭﺭ ﻣﯿﺮﮮ ﺧﯿﺎﻝ ﻣﯿﮟ ﻣﺤﮑﻮﻣﯿﺖ ﮐﮯ ﺑﺎﻭﺟﻮﺩ ﺍﺱ ﻓﻘﮧ ﮐﺎ ﺯﻧﺪﮦ ﺭﮨﻨﺎ ﺍﺟﺘﮩﺎﺩ ﮐﺎ ﺗﺴﻠﺴﻞ ﻗﺎﺋﻢ ﺭﮐﮭﻨﮯ ﮐﺎ ﻣﺮﮨﻮﻥ ﻣﻨﺖ ﮨﮯ، ﺟﺒﮑﮧ ﺍﮨﻠﺴﻨﺖ ﮐﯽ ﻓﻘﮧ ﺳﮯ ﺍﯾﮏ ﺗﻮ ﺍﻗﺘﺪﺍﺭ ﮐﺎ ﺳﮩﺎﺭﺍ ﭼﮭﻦ ﮔﯿﺎ، ﺩﻭﺳﺮﺍ ﺍﻧﮩﻮﮞ ﻧﮯ ﺍﺟﺘﮩﺎﺩ ﮐﮯ ﺩﺭﻭﺍﺯﮮ ﺑﻨﺪ ﮐﺮﺩﯾﮯ ﻇﺎﮨﺮ ﮨﮯ ﭘﺎﻧﯽ ﺯﯾﺎﺩﮦ ﺩﯾﺮ ﮐﮭﮍﺍ ﺭﮨﮯ ﺗﻮ ﻭﮦ ﺍﻧﺴﺎﻧﯽ ﺿﺮﻭﺭﯾﺎ ﺕ ﮐﻮ ﭘﻮﺭﺍ ﻧﮩﯿﮟ ﮐﺮﺳﮑﺘﺎ ﭘﺮﺍﻧﮯ ﺍﺟﺘﮩﺎﺩﺍﺕ ﺍﭘﻨﮯ ﺩﻭﺭ ﮐﮯ ﻟﺤﺎﻅ ﺳﮯ ﺗﻮ ﺩﺭﺳﺖ ﺗﮭﮯ ﻟﯿﮑﻦ ﺁﺝ ﺟﺪﯾﺪ ﺩﻭﺭ ﻣﯿﮟ ﺍﺟﺘﮩﺎﺩ ﻧﮧ ﮨﻮﻧﮯ ﮐﯽ ﻭﺟﮧ ﺳﮯ ﻭﮦ ﺍﻧﺴﺎﻧﯽ ﺿﺮﻭﺭﯾﺎﺕ ﮐﻮ ﭘﻮﺭﺍ ﻧﮧ ﮐﺮﺳﮑﮯ ﺍﻭﺭ ﯾﻮﮞ ﺁﮨﺴﺘﮧ ﺁﮨﺴﺘﮧ ﺍﻧﺪﺭﻭﻧﯽ ﻭ ﺑﯿﺮﻭﻧﯽ ﭨﻮﭦ ﭘﮭﻮﭦ ﮐﺎ ﺷﮑﺎﺭ ﮨﻮﮔﺌﮯ، ﺣﻨﻔﯽ ﺣﻀﺮﺍﺕ ﮐﯽ ﺍﮐﺜﺮﯾﺖ ﺗﻮ ﺍﺏ ﺑﮭﯽ ﺍﺟﺘﮩﺎﺩ ﮐﻮ ﺷﺠﺮ ﻣﻤﻨﻮﻋﮧ ﺳﻤﺠﮭﺘﯽ ﮨﮯ ﮔﻮﮐﮧ ﺑﻌﺾ ﺣﻨﻔﯽ ﻋﻠﻤﺎﺀ ﮐﻮ ﺍﺏ ﺍﺱ ﮐﺎ ﺍﺣﺴﺎﺱ ﮨﻮﮔﯿﺎ ﮨﮯ، ﻟﯿﮑﻦ ﺍﻥ ﮐﮯ ﻣﻘﺎﺑﻠﮧ ﻣﯿﮟ ﯾﮩﺎﮞ ﻣﻐﺮﺏ ﻣﯿﮟ ﺷﺎﻓﻌﯽ ﻣﺬﮨﺐ ﺯﯾﺎﺩﮦ ﻃﺎﻗﺘﻮﺭ ﮨﻮﺗﺎ ﺟﺎﺭﮨﺎ ﮨﮯ ﮐﯿﻮﻧﮑﮧ ﺍﻥ ﮐﮯ ﻋﻠﻤﺎﺀ ﻧﮯ ﺍﺣﻨﺎﻑ ﺳﮯ ﺑﮩﺖ ﭘﮩﻠﮯ ﺍﺟﺘﮩﺎﺩ ﮐﮯ ﺑﻨﺪ ﺩﺭﻭﺍﺯﮮ ﮐﻮ ﮐﮭﻮﻝ ﺩﯾﺎ ﺗﮭﺎ ﻟﯿﮑﻦ ﺍﺱ ﮐﮯ ﻃﺎﻗﺘﻮﺭ ﮨﻮﻧﮯ ﮐﺎ ﻣﻄﻠﺐ ﯾﮧ ﻧﮩﯿﮟ ﮐﮧ ﺍﮐﺜﺮﯾﺖ ﺍﺳﮯ ﻗﺒﻮﻝ ﮐﺮ ﺭﮨﯽ ﮨﮯ ﺑﻠﮑﮧ ﯾﮧ ﺑﻤﻘﺎﺑﻠﮧ ﺣﻨﻔﯿﺖ ﮨﮯ، ﺣﻘﯿﻘﺖ ﯾﮧ ﮨﮯ ﮐﮧ ﻋﻤﻠﯽ ﻃﻮﺭ ﭘﺮ ﺍﻥ ﭼﺎﺭﻭﮞ ﻓﻘﮧ ﺳﮯ ﮨﭧ ﮐﺮ ﺍﯾﮏ ﻧﺌﯽ ﻓﻘﮧ ﻣﻌﺮﺽ ﻭﺟﻮﺩ ﻣﯿﮟ ﺁﺭﮨﯽ ﮨﮯ ﺟﺒﮑﮧ ﺑﮩﺖ ﺳﺎﺭﮮ ﻧﻮﺟﻮﺍﻧﻮﮞ ﮐﺎ ﺭﺣﺠﺎﻥ ﻓﻘﮧ ﺳﮯ ﮨﭧ ﮐﺮ ﺑﺮﺍﮦ ﺭﺍﺳﺖ ﻓﻘﮧ ﺍﻟﻘﺮﺁﻥ ، ﻓﻘﮧ ﺍﻟﺴﻨﮧ ﺍﻭﺭ ﻓﻘﮧ ﺍﻟﺤﺪﯾﺚ ﮐﯽ ﻃﺮﻑ ﮨﻮ ﺭﮨﺎ ﺍﻭﺭ ﮨﻤﺎﺭﮮ ﺧﯿﺎﻝ ﻣﯿﮟ ﯾﮧ ﺍﯾﮏ ﺍﭼﮭﯽ ﺍﻭﺭ ﻣﺜﺒﺖ ﺗﺒﺪﯾﻠﯽ ﮨﮯ ۔
ﮐﯿﺎ ﯾﮧ ﺑﺎﺕ ﺣﯿﺮﺗﻨﺎﮎ ﻧﮩﯿﮟ ﮐﮧ ﺩﺱ ﺳﺎﻝ ﺗﮏ ﻣﺴﻠﺴﻞ ﺍﻟﻠﮧ ﮐﮯ ﻧﺒﯽ ﻧﮯ ﻧﻤﺎﺯ ﭘﮍﮬﺎﺋﯽ ﺍﻭﺭ ﺩﻥ ﻣﯿﮟ ﭘﺎﻧﭻ ﻣﺮﺗﺒﮧ ﭘﮍﮬﺎﺋﯽ، ﺍﺻﺤﺎﺏ ﻧﮯ ﻣﺴﻠﺴﻞ ﺍﻥ ﮐﮯ ﭘﯿﭽﮭﮯ ﻧﻤﺎﺯ ﭘﮍﮬﯽ ، ﺍﯾﮏ ﻏﯿﺮ ﻣﺴﻠﻢ ﻧﮯ ﮐﮩﺎ ﺗﻢ ﻟﻮﮒ ﺁﺝ ﺗﮏ ﯾﮩﯽ ﻃﮯ ﻧﮩﯿﮟ ﮐﺮﺳﮑﮯ ﮐﮧ ﻧﻤﺎﺯ ﻣﯿﮟ ﺗﻤﮩﺎﺭﺍ ﻧﺒﯽ ﮨﺎﺗﮫ ﮐﮩﺎﮞ ﺑﺎﻧﺪﮬﺘﺎ ﺗﮭﺎ ﺑﺎﻗﯽ ﺑﺎﺗﯿﮟ ﺗﻮ ﺭﮨﯿﮟ ﺍﯾﮏ ﻃﺮﻑ ۔
ﺳﺐ ﺯﯾﺎﺩﮦ ﻋﻤﻞ ﺍﻣﺖ ﻧﮯ ﺭﺳﻮﻝ ﺍﻟﻠﮧ ﮐﻮ ﮐﺮﺗﮯ ﮨﻮﺋﮯ ﺟﻮ ﺩﻥ ﺭﺍﺕ ﺩﯾﮑﮭﺎ ﻭﮦ ﻧﻤﺎﺯ ﮨﮯ ﻟﯿﮑﻦ ﺗﮑﺒﯿﺮ ﺗﺤﺮﯾﻤﮧ ﺳﮯ ﻟﯿﮑﺮ ﺳﻼﻡ ﺗﮏ ﮐﺴﯽ ﺍﯾﮏ ﭼﯿﺰ ﭘﺮ ﺑﮭﯽ ﺗﻮ ﺍﺗﻔﺎﻕ ﻧﮩﯿﮟ، ﺍﯾﮏ ﮐﮯ ﻧﺰﺩﯾﮏ ﻓﺎﺗﺤﮧ ﻭﺍﺟﺐ ﮨﮯ ، ﺩﻭﺳﺮﮮ ﮐﮯ ﻧﺰﺩﯾﮏ ﻓﺮﺽ ﮨﮯ، ﺍﯾﮏ ﮐﮯ ﻧﺰﺩﯾﮏ ﺭﮐﻮﻉ ﮐﮯ ﺑﻌﺪ ﻗﻮﻣﮧ ﺍﻭﺭ ﺳﺠﺪﻭﮞ ﮐﮯ ﺩﺭﻣﯿﺎﻥ ﺟﻠﺴﮧ ﻓﺮﺽ ﺟﺒﮑﮧ ﺩﻭﺳﺮﮮ ﮐﮯ ﻧﺰﺩﯾﮏ ﻧﮩﯿﮟ، ﺁﭖ ﻧﮯ ﮐﯿﺎ ﺳﻤﺠﮭﺎ ﯾﮧ ﻣﺤﺾ ﺍﯾﮏ ﻣﻌﻤﻮﻟﯽ ﺳﺎ ﻟﻔﻈﯽ ﺍﺧﺘﻼﻑ ﮨﮯ ؟ ﻧﮩﯿﮟ ، ﺳﺐ ﺍﻣﺎﻡ ﮐﮩﺘﮯ ﮨﯿﮟ ﻓﺮﺽ ﭼﮭﻮﭦ ﺟﺎﺋﮯ ﺗﻮ ﻧﻤﺎﺯ ﻧﮩﯿﮟ ﮨﻮﺗﯽ ، ﺳﯿﺪﮬﯽ ﺳﯽ ﺑﺎﺕ ﮨﮯﺟﺐ ﻧﻤﺎﺯ ﮐﮯ ﺍﺭﮐﺎﻥ ﻭ ﻓﺮﺍﺋﺾ ﮨﯽ ﻣﺨﺘﻠﻒ ﮨﯿﮟ ﺗﻮ ﺍﯾﮏ ﮐﮯ ﻧﺰﺩﯾﮏ ﺩﻭﺳﺮﮮ ﮐﯽ ﻧﻤﺎﺯ ﮨﯽ ﻧﮩﯿﮟ، ﮐﯿﺎ ﺍﻥ ﭼﺎﺭﻭﮞ ﻓﻘﮧ ﺳﮯ ﭘﮩﻠﮯ ﻟﻮﮒ ﻧﻤﺎﺯ ﻧﮧ ﭘﮍﮬﺘﮯ ﺗﮭﮯ؟ ﯾﮧ ﻧﻤﺎﺯ ﮐﯽ ﺷﺮ ﻃﯿﮟ ،ﻓﺮﺍﺋﺾ، ﻭﺍﺟﺒﺎﺕ، ﺳﻨﺘﯿﮟ ، ﻣﺴﺘﺤﺒﺎﺕ، ﻣﮑﺮﻭﮨﺎﺕ، ﻣﻔﺴﺪﺍﺕ ﺟﻮ ﻓﻘﮧ ﻣﯿﮟ ﻣﻘﺮﺭ ﮐﯿﮯ ﮔﺌﮯ ﮨﯿﮟ ﺍﻥ ﺳﮯ ﺧﻠﻔﺎﺋﮯ ﺭﺍﺷﺪﯾﻦ ﻭﺍﻗﻒ ﺗﮭﮯ ؟ ﺍﮔﺮ ﻭﺍﻗﻒ ﺗﮭﮯ ﺗﻮ ﺛﺒﻮﺕ ﮐﯿﺎ ﮨﮯ ، ﺍﮔﺮ ﻧﮩﯿﮟ ﺗﮭﮯ ﺗﻮ ﮐﯿﺎ ﺍﻥ ﮐﯽ ﻧﻤﺎﺯﯾﮟ ﮨﻮﺋﯿﮟ ﯾﺎ ﻧﮩﯿﮟ ؟
ﮨﻨﺪﻭﺳﺘﺎﻥ ﮐﮯ ﺍﯾﮏ ﺑﮩﺖ ﺑﮍﮮ ﻋﺎﻟﻢ ﺩﯾﻦ ﺟﻦ ﮐﮯ ﺷﺎﮔﺮﺩﻭﮞ ﺳﮯ ﮨﻨﺪ ﻭ ﭘﺎﮎ، ﺑﺮﺻﻐﯿﺮ ﭘُﺮ ﮨﮯ ﻭﮦ ﻓﺮﻣﺎﺗﮯ ﮨﯿﮟ ﺩﻟﯿﻞ ﺍﻣﺎﻡ ﺷﺎﻓﻌﯽ ﮐﯽ ﻗﻮﯼ ﮨﮯ ﻟﯿﮑﻦ ﮨﻢ ﺗﻮ ﭼﻮﻧﮑﮧ ﻣﻘﻠﺪ ﮨﯿﮟ ﺑﺎﺕ ﺗﻮ ﺍﭘﻨﮯ ﺍﻣﺎﻡ ﮐﯽ ﮨﯽ ﻣﺎﻧﯿﮟ ﮔﮯ۔
ﻗﺮﺁﻥ ﮐﮩﺘﺎ ﮨﮯ ﺍﺫﺍ ﺣﻴﻴﺘﻢ ﺑﺘﺤﻴﺔ ﻓﺤﻴﻮﺍ ﺑﺎﺣﺴﻦ ﻣﻨﻬﺎ ﺍﻭ ﺭُﺩُّﻭﻫَﺎ ، ﻟﯿﮑﻦ ﮨﻢ ﺍﺑﮭﯽ ﺗﮏ ﺍﺱ ﺑﺎﺕ ﻣﯿﮟ ﺍﻟﺠﮭﮯ ﮨﻮﺋﮯ ﮨﯿﮟ ﮐﮧ ﻏﯿﺮ ﻣﺴﻠﻢ ﮐﻮ ﺳﻼﻡ ﮐﮩﻨﺎ ﺟﺎﺋﺰ ﮨﮯ ﯾﺎ ﻧﮩﯿﮟ ، ﻏﯿﺮ ﻣﺴﻠﻢ ﮐﮯ ﻣﻠﮏ ﻣﯿﮟ ﺭﮨﻨﺎ، ﭘﻮﻧﮉ ﮐﻤﺎﻧﺎ، ﮨﺮ ﻃﺮﺡ ﮐﮯ ﺑﯿﻨﯿﻔﭧ ﺣﺎﺻﻞ ﮐﺮﻧﺎ ﯾﮧ ﺳﺐ ﮐﭽﮫ ﻋﯿﻦ ﺩﯾﻦ ﮨﮯ ﻟﯿﮑﻦ ﺍﺳﮯ ﺳﻼﻣﺘﯽ ﮐﯽ ﺩﻋﺎ ﺩﯾﻨﺎ ﺩﯾﻦ ﮐﮯ ﺧﻼﻑ ﮨﮯ ﮐﮧ ﮐﮩﯿﮟ ﻭﮦ ﺗﻤﮩﺎﺭﯼ ﺩﻋﺎ ﮐﯽ ﻭﺟﮧ ﺳﮯ ﺍﺱ ﺳﻼﻣﺘﯽ ﻭﺍﻟﮯ ﺍﺳﻼﻡ ﻣﯿﮟ ﺩﺍﺧﻞ ﻧﮧ ﮨﻮﺟﺎﺋﮯ ۔
ﮨﻢ ﻧﮧ ﻓﻘﮧ ﮐﯽ ﺗﻨﻘﯿﺺ ﮐﺮ ﺭﮨﮯ ﮨﯿﮟ ﺍﻭﺭ ﻧﮧ ﻓﻘﮩﺎﺀ ﮐﯽ ﺗﻮﮨﯿﻦ ، ﮨﻢ ﺻﺮﻑ ﯾﮧ ﺑﺘﺎﻧﺎ ﭼﺎﮨﺘﮯ ﮨﯿﮟ ﮐﮧ ﻋﻠﻮﻡ ﮐﻮ ﻧﺌﮯ ﺳﺮﮮ ﺳﮯ ﻣﺮﺗﺐ ﮐﺮﻧﮯ ﮐﯽ ﺿﺮﻭﺭﺕ ﮨﮯ، ﻓﻘﮩﺎﺀ ﮐﮯ ﺳﺎﺗﮫ ﺩﻓﺘﺮﻭﮞ ﻣﯿﮟ ﮔﻮﺭﯾﺎﮞ ﮐﺎﻡ ﻧﮩﯿﮟ ﮐﺮﺗﯽ ﺗﮭﯿﮟ، ﺍﻧﮩﯿﮟ ﮐﺒﮭﯽ ۱۹ ﮔﮭﻨﭩﻮﮞ ﺳﮯ ﻟﯿﮑﺮ ۲۳ ﮔﮭﻨﭩﻮﮞ ﺗﮏ ﺭﻭﺯﮦ ﺭﮐﮭﻨﮯ ﮐﺎ ﺗﺠﺮﺑﮧ ﻧﮩﯿﮟ ﮨﻮﺍ، ﺍﻧﮩﻮﮞ ﻧﮯ ﺗﻮ ﻟﮑﮫ ﺩﯾﺎ ﮐﮧ ﮐﻔﺎﺭ ﮐﮯ ﻣﻠﮏ ﻣﯿﮟ ﻗﺮﺍﻥ ﮐﮯ ﺟﺎﻧﺎ ﺟﺎﺋﺰ ﻧﮩﯿﮟ، ﻟﯿﮑﻦ ﺁﺝ ﻣﺴﻠﻤﺎﻥ ﺭﮨﺘﺎ ﮨﯽ ﮐﻔﺎﺭ ﮐﮯ ﻣﻠﮏ ﻣﯿﮟ ﮨﮯ، ﺍﻧﮩﯿﮟ ﺑﻠﮉ ﺑﻨﮏ ، ﻣﻠﮏ ﺑﻨﮏ ، ﺍﻋﻀﺎ ﮐﯽ ﭘﯿﻮﻧﺪ ﮐﺎﺭﯼ، ﮈﯼ ﺍﯾﻦ ﺍﮮ ﭨﯿﺴﭧ، ﭘﺎﺳﭙﻮﺭﭦ، ﻻﺋﺴﻨﺲ، ﺁﺋﯽ ﮈﯼ ﮐﺎﺭﮈ، ﺍﻭﺭ ﻧﻮﭦ ﭘﺮ ﺗﺼﻮﯾﺮ ﮐﺎ ﻣﺮﺣﻠﮧ ﭘﯿﺶ ﻧﮩﯿﮟ ﺁﯾﺎ، ﺍﻧﮩﻮﮞ ﻧﮯ ﺍﯾﺮﭘﻮﺭﭦ ﭘﺮ ﻋﻮﺭﺕ ﮐﺎ ﭼﮩﺮﮦ ﻧﻨﮕﺎ ﮐﺮﻭﺍﮐﺮ ﭼﯿﮑﻨﮓ ﮐﮯ ﻣﺮﺣﻠﮧ ﺳﮯ ﮔﺬﺭﺗﮯ ﻧﮩﯿﮟ ﺩﯾﮑﮭﺎ، ﺍﻧﮩﻮﮞ ﻧﮯ ﮨﻮﺍﺋﯽ ﺟﮩﺎﺯ ﻣﯿﮟ ﮐﺒﮭﯽ ﻧﻤﺎﺯ ﻧﮩﯿﮟ ﭘﮍﮬﯽ، ﻣﻮﭨﺮ ﮐﺎﺭ، ﺑﺲ ﺍﻭﺭ ﭨﺮﯾﻦ ﻣﯿﮟ ﻧﻤﺎﺯﯾﮟ ﺍﺩﺍ ﻧﮩﯿﮟ ﻓﺮﻣﺎﺋﯿﮟ، ﮔﺮﺩﻭﮞ ﺍﻭﺭ ﺟﮕﺮ ﮐﮯ ﭨﺮﺍﻧﺴﭙﻼﭦ ﺗﺐ ﻧﮩﯿﮟ ﮨﻮﺗﮯ ﺗﮭﮯ، ﺍﻥ ﮐﺎ ﺩﻭﺭ ﻭﮦ ﺗﮭﺎ ﺟﺐ ﻣﺴﻠﻤﺎﻥ ﺳﭙﺮ ﭘﺎﻭﺭ ﺗﮭﮯ ﺍﺱ ﻟﯿﮯ ﺍﻧﮩﻮﮞ ﻧﮯ ﺩﻧﯿﺎ ﮐﻮ ﺩﻭ ﺣﺼﻮﮞ ﻣﯿﮟ ﺗﻘﺴﯿﻢ ﮐﯿﺎ ﺩﺍﺭﺍﺣﺮﺏ ﺍﻭﺭ ﺩﺍﺭﺍﻻﻣﻦ ﯾﺎ ﺩﺍﺭﻟﮑﻔﺮ ﺍﻭﺭ ﺩﺍﺭﺍﻻﺳﻼﻡ ﻟﯿﮑﻦ ﺁﺝ ﻣﺪﻧﯿﺖ ﺍﻭﺭ ﻣﻌﺎﺷﺮﺕ ﺑﺪﻝ ﮔﺌﯽ ﮨﮯ، ﺁﺝ ﻣﺴﻠﻤﺎﻥ ﻓﻘﮩﺎﺀ ﮐﮯ ﺑﯿﺎﻥ ﮐﺮﺩﮦ ﺩﺍﺭﺍﻟﺤﺮﺏ ﻣﯿﮟ ﻧﺴﺒﺘﺎ ﺯﯾﺎﺩﮦ ﻣﺤﻔﻮﻅ ﮨﮯ، ﺁﺝ ﺑﮭﯽ ﭘﻮﺭﺍ ﻣﻐﺮﺏ ﺍﺳﻼﻡ ﺍﻭﺭ ﻣﺴﻠﻤﯿﻦ ﮐﮯ ﺧﻼﻑ ﺑﺮﺳﺮ ﺟﻨﮓ ﮨﮯ، ﺍﻓﻐﺎﻧﺴﺘﺎﻥ ﻭ ﻋﺮﺍﻕ ﻣﯿﮟ ﺟﻨﮓ ﺍﺗﺤﺎﺩﯼ ﺍﻓﻮﺍﺝ ﻧﮯ ﻟﮍﯼ ﺍﻭﺭ ﻟﮍ ﺭﮨﮯ ﮨﯿﮟ ﺗﻮ ﮐﯿﺎ ﯾﮧ ﺩﺍﺭﻟﺤﺮﺏ ﻗﺮﺍﺭ ﺩﯾﮯ ﺟﺎﺋﯿﮟ ﮔﮯ ؟ ﺑﮩﺖ ﮐﭽﮫ ﺑﺪﻝ ﮔﯿﺎ ﮨﮯ ﺑﻠﮑﮧ ﺳﺐ ﮐﭽﮫ ﺑﺪﻝ ﮔﯿﺎ ﮨﮯ، ﻧﺌﮯ ﺍﺟﺘﮩﺎﺩ ﺍﻭﺭ ﻧﺌﯽ ﻓﻘﮧ ﮐﯽ ﺿﺮﻭﺭﺕ ﮨﮯ، ﭘﮭﺮ ﺍﺟﺘﮩﺎﺩ ﮐﮯ ﻟﯿﮯ ﺟﻮ ﺷﺮﻃﯿﮟ ﻣﻘﺮﺭ ﮐﯽ ﮔﺌﯽ ﮨﯿﮟ ﻭﮦ ﺑﮭﯽ ﺍﻣﺎﻣﻮﮞ ﺍﻭﺭ ﻓﻘﮩﺎﺀ ﮐﯽ ﮨﯽ ﻋﺎﺋﺪ ﮐﺮﺩﮦ ﮨﯿﮟ ﺟﻨﮩﯿﮟ ﺭﺳﻮﻝ ﺍﻟﻠﮧ ﻧﮯ ﺑﯿﺎﻥ ﻧﮩﯿﮟ ﮐﯿﺎ، ﺍﻥ ﻣﯿﮟ ﺳﮯ ﺍﮐﺜﺮ ﺷﺮﺍﺋﻂ ﺗﻮ ﺍﺱ ﮐﺎ ﻣﺼﺪﺍﻕ ﮨﯿﮟ ﮐﮧ ؛ ﻧﮧ ﻧﻮ ﻣﻦ ﺗﯿﻞ ﮨﻮﮔﺎ ﺍﻭﺭ ﻧﮧ ﮨﯽ ﺭﺍﺩﮬﺎ ﻧﺎﭼﮯ ﮔﯽ ۔ ﯾﻌﻨﯽ ﻏﯿﺮ ﻧﺒﯽ ﺍﻭﺭ ﻏﯿﺮ ﺻﺤﺎﺑﮧ ﮐﯽ ﻋﺎﺋﺪ ﮐﺮﺩﮦ ﺷﺮﻃﯿﮟ ﻧﮧ ﮨﻮﻧﮕﯽ ﺗﻮ ﺍﺟﺘﮩﺎﺩ ﺑﮭﯽ ﻧﮧ ﮨﻮﮔﺎ ﺍﻭﺭ ﯾﻮﮞ ﭨﺮﯾﻔﮏ ﺟﺎﻡ ﮨﯽ ﺭﮨﮯ ﮔﺎ۔ ﮨﻤﺎﺭﮮ ﺑﺰﺭﮒ ﺗﻮ ﯾﮧ ﺑﮭﯽ ﻟﮑﮫ ﮔﺌﮯ ﮐﮧ ﺷﺎﻓﻌﯽ ﺍﻟﻤﺬﮬﺐ ﻣﻘﻠﺪ ﺍﭘﻨﮯ ﺍﻣﺎﻡ ﮐﯽ ﺗﻘﻠﯿﺪ ﭼﮭﻮﮌ ﮐﺮ ﺣﻨﻔﯽ ﺑﻦ ﺳﮑﺘﺎ ﮨﮯ ﻟﯿﮑﻦ ﺣﻨﻔﯽ ﻣﻘﻠﺪ ﮐﮯ ﻟﯿﮯ ﺷﺎﻓﻌﯽ ﮐﯽ ﺗﻘﻠﯿﺪ ﺟﺎﺋﺰ ﻧﮩﯿﮟ ، ﻓﺘﺎﻭﯼ ﻋﺎﻟﻤﮕﯿﺮﯼ ﮐﮯ ﺑﻌﺾ ﻣﺒﺎﺣﺚ ﮐﻮ ﺍﮔﺮ ﺍﻣﺎﻡ ﺍﺑﻮﺣﻨﯿﻔﮧ ﺭﺡ ﺩﯾﮑﮫ ﻟﯿﮟ ﺗﻮ ﺍﻥ ﮐﯽ ﺭﻭﺡ ﺑﮭﯽ ﮐﺎﻧﭗ ﺍﭨﮭﮯ

No comments:

Post a Comment