وہ اپنی اوقات نہ بھولا

وہ یوکرائن کے ایک غریب یہودی خاندان میں پیدا ہوا، خاندان عسرت میں زندگی گزار رہا تھا، گھر میں بجلی تھی، گیس تھی اور نہ ہی پانی تھا، گرمیاں خیریت سے گزر جاتی تھیں لیکن یہ لوگ سردیوں میں بھیڑوں کے ساتھ سونے پرمجبور ہوجاتے تھے، اس غربت میں 1992ء میں زیادتی بھی شامل ہو گئی، یوکرائن میں یہودیوں پر ایک بار پھر ظلم شروع ہو گیا، والدہ نے نقل مکانی کا فیصلہ کیا لیکن والد نے وطن چھوڑنے سے انکار کردیا۔
ماں نے بیٹے کا ہاتھ تھاما، اٹیچی کیس میں بیٹے کی کتابیں بھریں اور یہ دونوں امریکہ آگئے. کیلیفورنیا ان کا نیا دیس تھا، امریکہ میں ان کے پاس مکان تھا، روزگار تھا اور نہ ہی کھانے پینے کا سامان، یہ دونوں ماں بیٹا مکمل طور پر خیرات کے سہارے چل رہے تھے. امریکہ میں ’’فوڈ سٹمپ‘‘ کے نام سے ایک فلاحی سلسلہ چل رہا ہے، حکومت انتہائی غریب لوگوں کو کھانے پینے کی اشیاء خریدنے کے لئے فوڈ سٹمپس دیتی ہے، یہ سٹمپس امریکی خیرات ہوتی ہیں، یہ لوگ اتنے غریب تھے کہ یہ زندگی بچانے کے لئے خیرات لینے پر مجبور تھے۔
جین کوم کے پاس پڑھائی کے علاوہ کوئی چارہ نہیں تھا، یہ پڑھنے لگا، وقت گزرنے کے ساتھ ساتھ پڑھائی مہنگی ہونے لگی، فوڈ سٹمپس میں گزارہ مشکل ہو گیا. جین کوم نے پارٹ ٹائم نوکری تلاش کی. خوش قسمتی سے اسے ایک گروسری اسٹور میں سویپر کی ملازمت مل گئی. اسٹور کے فرش سے لے کر باتھ روم اور دروازوں کھڑکیوں سے لے کر سڑک تک صفائی اس کی ذمے داری تھی. وہ برسوں یہ ذمے داری نبھاتا رہا، وہ اٹھارہ سال کی عمر میں کمپیوٹر پروگرامنگ کے خبط میں مبتلا ہوگیا. یہ شوق اسے سین جوز اسٹیٹ یونیورسٹی میں لے گیا. وہ 1997ء میں ’’یاہو‘‘ میں بھرتی ہوا اور اس نے نو سال تک سر نیچے کرکے یاہو میں گزار دیئے۔
2004ء میں فیس بک آئی، یہ آہستہ آہستہ مقبول ہو تی چلی گئی، یہ 2007ء میں دنیا کی بڑی کمپنی بن گئی. جین کوم نے فیس بک میں اپلائی کیا لیکن فیس بک کو اس میں کوئی پوٹینشل نظر نہ آیا. وہ یہ نوکری حاصل نہ کر سکا. وہ مزید دو سال ’’یاہو‘‘ میں رہا. وہ آئی فون خریدنا چاہتا تھا لیکن حالات اجازت نہیں دے رہے تھے. اس نے تھوڑے تھوڑے پیسے جمع کئے اور نیا آئی فون خرید لیا. یہ آئی فون آگے چل کر اس کے لئے سونے کی کان ثابت ہوا۔
جین کوم نے فون استعمال کرتے کرتے سوچا، میں کوئی ایسی ایپلی کیشن کیوں نہ بناؤں جو فون کا متبادل بھی ہو، جس کے ذریعے ایس ایم ایس بھی کیا جاسکے، تصاویر بھی بھجوائی جا سکیں، ڈاکومنٹس بھی روانہ کئے جاسکیں اور جسے ’’ہیک‘‘ بھی نہ کیا جا سکے، یہ ایک انوکھا آئیڈیا تھا. اس نے یہ آئیڈیا اپنے ایک دوست برائن ایکٹون کے ساتھ شیئر کیا. یہ دونوں اسی آئیڈیا پر مرکوز ہوگئے. یہ کام کرتے رہے. کام کرتے رہے... یہاں تک کہ یہ دو سال میں ایک طلسماتی ایپلی کیشن بنانے میں کامیاب ہوگئے‘ یہ ’’ایپ‘‘ فروری 2009ء میں لانچ ہوئی اور یہ دیکھتے ہی دیکھتے مقبولیت کی حدیں پار کرگئی. یہ ایپ ٹیلی کمیونیکیشن میں انقلاب تھی. اس نے پوری دنیا کو جوڑدیا۔
یہ ایپلی کیشن واٹس ایپ کہلاتی ہے. دنیا کے ایک ارب لوگ اس وقت یہ ایپ استعمال کر رہے ہیں. یہ ایپ دنیا کا تیز ترین اور محفوظ ترین ذریعہ ابلاغ ہے. آپ واٹس ایپ ڈاؤن لوڈ کریں اور آپ دنیا کے کسی بھی کونے میں چلے جائیں آپ کو نیا فون اور نیا نمبر خریدنے کی ضرورت پڑے گی اور نہ ہی آپ کسی موبائل کمپنی کے ہاتھوں بلیک میل ہوں گے. آپ پوری دنیا کے ساتھ رابطے میں رہیں گے۔ جین کوم کو واٹس ایپ نے چند ماہ میں ارب پتی بنا دیا. یہ ایپلی کیشن اس قدر کامیاب ہوئی کہ دنیا بھر کی کمپنیوں نے اس کی خریداری کے لئے بولی دینا شر وع کر دی لیکن یہ انکار کرتا رہا۔
فروری 2014ء میں فیس بک بھی ’’واٹس ایپ‘‘ کی خریداری کی دوڑ میں شامل ہوگئی. فیس بک کی انتظامیہ نے جب اس سے رابطہ کیا تو اس کی ہنسی چھٹ گئی. اس نے خدا کا شکر ادا کیا اور قہقہہ لگاکر کہا، ’’یہ وہ ادارہ ہے جس نے مجھے 2007ء کے دوران نوکری دینے سے انکار کر دیا تھا!‘‘ وہ دیر تک ہنستا رہا، اس نے اس ہنسی کے دوران ’’فیس بک‘‘ کو ہاں کر دی، 19 بلین ڈالر میں سودا ہو گیا.
جین کوم نے فیس بک کے ساتھ سودے میں صرف ایک شرط رکھی’’میں فوڈ سٹمپس دینے والے ادارے کے ویٹنگ روم میں بیٹھ کر دستخط کروں گا.‘‘ فیس بک کے لئے یہ شرط عجیب تھی، یہ لوگ یہ معاہدہ اپنے دفتر یا اس کے آفس میں کرنا چاہتے تھے لیکن وہ ٹس سے مس نہ ہوا، یہاں تک کہ فیس بک اس کی ضد کے سامنے پسپا ہونے پر مجبور ہو گئی. ایک تاریخ طے ہوئی، فیس بک کے لوگ فلاحی سینٹر پہنچے، وہ ویٹنگ روم کے آخری کونے کی آخری کرسی پر بیٹھا ہوا وہ رو رہا تھا، وہ کیوں نہ روتا، یہ وہ سینٹر تھا جس کے اس کونے کی اس آخری کرسی پر بیٹھ کر وہ اور اس کی ماں گھنٹوں ’’فوڈ سٹمپس‘‘ کا انتظار کرتے تھے۔
یہ دونوں کئی بار بھوکے پیٹ یہاں آئے اور شام تک بھوکے پیاسے یہاں بیٹھے رہے. ویٹنگ روم میں بیٹھنا اذیت ناک تھا لیکن اس سے بڑی اذیت کھڑکی میں بیٹھی خاتون تھی، وہ خاتون ہر بار نفرت سے ان کی طرف دیکھتی تھی، طنزیہ مسکراتی تھی اور پوچھتی تھی،
’’تم لوگ کب تک خیرات لیتے رہو گے، تم کام کیوں نہیں کرتے.‘‘
یہ بات سیدھی ان کے دل میں ترازو ہوجاتی تھی لیکن یہ لوگ خاموش کھڑے رہتے تھے۔
خاتون انھیں ’’سلپ‘‘ دیتی تھی، ماں کاغذ پر دستخط کرتی تھی اور یہ لوگ آنکھیں پونچھتے ہوئے واپس چلے جاتے تھے، وہ برسوں اس عمل سے گزرتا رہا چنانچہ جب کامیابی ملی تو اس نے اپنی زندگی کی سب سے بڑی کامیابی اس ویٹنگ روم میں منانے کا فیصلہ کیا‘ اس نے 19 بلین ڈالر کی ڈیل پر ’’فوڈ سٹمپس‘‘ کے انتظار میں بیٹھے لوگوں کے درمیان بیٹھ کر دستخط کئے، چیک لیا اور سیدھا کاؤنٹر پر چلا گیا. فوڈ سٹمپس دینے والی خاتون آج بھی وہاں موجود تھی. جین نے 19بلین ڈالر کا چیک اس کے سامنے لہرایا اور ہنس کر کہا ’’آئی گاٹ اے جاب‘‘ اور سینٹر سے باہر نکل گیا۔
یہ ایک غریب امریکی کے عزم و ہمت کی انوکھی داستان ہے، یہ داستان ثابت کرتی ہے آپ اگر ڈٹے رہیں، محنت کرتے رہیں اور ہمت قائم رکھیں تو اللہ تعالیٰ آپ کے لئے کامیابی کے دروازے کھولتا چلا جاتا ہے.